«Բավականին արտառոց դեպք է տեղի ունեցել, և ես հույս ունեմ, որ ՀՀ իրավասու մարմինները՝ դատախազության գլխավորությամբ, շատ արագ կպարզեն գործի իրական հանգամանքները և հանրությանը կտրամադրեն տեղեկատվություն Հայկ Հարությունյանի մահվան հանգամանքների վերաբերյալ»,- «Առաջին լրատվական»-ի հետ զրույցում նշեց փաստաբան Նորայր Նորիկյանը՝ հավելելով, որ դրանից հետո շատ հարցեր կհստակեցվեն:
Մեր զրուցակցի խոսքով՝ Հայկ Հարությունյանը ոչ միայն Մարտի 1-ի գործով էր առանցքային վկա, այլև, պայմանավորված իր զբաղեցրած պաշտոնով, նա անձամբ նաև առանցքային դերակատարություն և նշանակություն է ունեցել. «Հաշվի առնենք, որ Հայկ Հարությունյանը ոստիկանապետ է նշանակվել 1999թ. հոկտեմբերի 27-ի ողբերգական իրադարձություններից հետո՝ Ռոբերտ Քոչարյանի հրամանագրով, և ըստ էության Ռոբերտ Քոչարյանի հետ էլ հեռացել է այդ պաշտոնից»:
Նորայր Նորիկյանն ընդգծեց՝ իրավապահ մարմինների սրբազան պարտականությունն է պարզել, թե ինչն է եղել Հայկ Հարությունյանի մահվան պատճառը. «ՀՀ պետության և քաղաքական իշխանության շահերից է բխում օր առաջ հայտնաբերել և պարզել իրական հանգամանքները. որևէ մեկի մոտ որևէ կասկած չպետք է մնա այս գործի նախաքննության որակի ուղղվածության վերաբերյալ: Այս գործում պետք է իրականացվի 100 տոկոս օբյեկտիվ, բազմակողմանի քննություն՝ պարզելու համար մահվան իրական հանգամանքները»:
Ինչպես նշեց մեր զրուցակիցը՝ որևէ մեկը չի բացառում, որ Հայկ Հարությունյանը կարող էր Մարտի 1-ի քրեական գործով իրականացվող դատաքննության ընթացքում տալ այնպիսի ցուցմունքներ, որոնք կարող էին շոկ առաջացնել, լույս սփռել Մարտի 1-ի ոճրագործության բացահայտման վրա. «Բայց ունենք այն, ինչ ունենք: Ուստի ձեռնտու լինելու մասին խոսակցություններին հնարավոր կլինի անդրադառնալ միայն մահվան իրական հանգամանքները պարզելուց հետո»:
Հարցազրույցն ամբողջությամբ՝ տեսանյութում:
