Արթուր Վանեցյանի ՀՖՖ-ի նախագահի պաշտոնից հեռանալու հարցը արդեն իսկ կարելի է օրակարգային համարել: ԱԱԾ նախկին պետի այսօրվա հայտարարությունը զայրույթի լայն ալիք է բարձրացրել հասարակության շրջանում: Մասնավորապես, շատերն այն կարծիքին են, որ պետությանը թիկունքից հարված հասցրած, ինչպես նաև ժողովրդի կողմից ընտրված երկրի ղեկավարի հետ շանտաժի լեզվով խոսող անձը բարոյական իրավունք չունի մեզ համար առանցքային մարզաձևը ղեկավարելու, և որ նրա պաշտոնավարումը ՀՖՖ-ում ուղղակի անթույլատրելի է: Նախօրեին Լոս Անջելեսում տեղի ունեցած մամուլի ասուլիսի ժամանակ հարցին, թե դուք շարունակո՞ւմ եք պնդել, որ Արթուր Վանեցյանը մնա Հայաստանի ֆուտբոլի ֆեդերացիայի նախագահ, դա նորմալ համարո՞ւմ եք, Նիկոլ Փաշինյանը պատասխանել էր. «Ինչի, ես երբևէ պնդե՞լ եմ… ես էն ինֆորմացիան եմ փոխանցել, ինչը մենք խոսել ենք: Ես այդ հանձնարարությունն եմ տվել իրեն, և ոնց որ թե այդ հանձնարարությունն ընդունվել է ի գիտություն: Իսկ ֆեդերացիան ունի անդամներ, գործկոմ, կառույցներ․ իրենք կքննարկեն, կորոշեն»:
Իրականում ինչ պատկեր ենք ստանում: Նիկոլ Փաշինյանը Վանեցյանի հետ պայմանավորվածություն է ունեցել ԱԱԾ-ի պետի պաշտոնից հեռանալուց ՀՖՖ-ում աշխատանքը շարունակելու մասին: Ավելին, Փաշինյանը հույս էր հայտնել, որ Վանեցյանը ամեն ինչ կանի Հայաստանի Ազգային հավաքականին Եվրո-2020-ի եզրափակիչ փուլ դուրս բերելու համար: ԱԱԾ-ի պաշտոնից Վանեցյանին հեռացնելու մասին Փաշինյանի հայտարարության պահին, կարծես թե, ամեն ինչ հստակ էր, բայց․․․ Րոպեներ անց ԱԱԾ-ի պաշտոնական կայքում հայտնվեց Վանեցյանի հրաժարականի աղմկահարույց տեքստը: Կարծում ենք՝ պարզ է, որ այս հայտարարությամբ Վանեցյանը ուղղակիորեն խախտել է պայմանավորվածությունը: Իրավիճակն իսկապես մտահոգիչ է և վտանգավոր հայկական ֆուտբոլի համար: Կարծում ենք՝ պարզ է, որ տեղի ունեցած զարգացումներից հետո քիչ հավանական է, որ Վանեցյանը շարունակի աշխատանքը ՀՖՖ-ում:
Իսկ ինչպես է հնարավոր Վանեցյանի հեռացումը ՀՖՖ-ի նախագահի պաշտոնից: Փաշինյանի հայտարարությունից հետո շատերն այն կարծիքին են, որ Վանեցյանին կարող է պաշտոնանկ անել ՀՖՖ-ի գործկոմը: Նշենք, սակայն, որ դա այդպես չէ, և Վանեցյանի երկրորդ պաշտոնից հեռացնելը, կարծես թե, ավելի բարդ գործընթաց է պահանջում: Իրականում ՀՖՖ-ի գործկոմը չի կարող նախագահի հեռացման հարց քննարկել, քանզի չունի այդ իրավասությունը: Գործադիր կոմիտեի անդամները, ինչպես նաև ՀՖՖ-ի նախագահը, ըստ կանոնակարգի, ընտրվում են ՀՖՖ֊-ի ԻԱՄ անդամների կողմից: Դրանք 25-ն են, և յուրաքանչյուր անդամ ունի 3 ձայնի իրավունք: Լավատեղյակ աղբյուրների համաձայն՝ ԻԱՄ անդամների զգալի մասը մինչ օրս գտնվում է ՀՖՖ-ի նախկին նախագահ Ռուբեն Հայրապետյանի վերահսկողության տակ: Փաստորեն, Արթուր Վանեցյանին, ըստ ՀՖՖ-ի կանոնակարգի, կարող է անվստահություն հայտնել և պաշտոնանկ անել թերևս Ռուբեն Հայրապետյանը: Վերջինս, սակայն, կարծես հակված չէ նման քայլի դիմելու: Ֆուտբոլասերների շրջանում այսօր էլ շարունակվում են խոսակցությունները, որոնց համաձայն, Արթուր Վանեցյանը, համենայնդեպս, վատ հարաբերությունների մեջ չէ Ռուբեն Հայրապետյանի հետ: Այս պահին հարկ ենք համարում հրապարակել փաստաթուղթը, որում ՀՖՖ-ի ԻԱՄ 25 անդամներն են, ինչպես նաև նախորդ ընտրություններում նրանց կողմից առաջադրված նախագահի թեկնածուններն ու գործկոմի անդամները:
