Իշխանություն-ընդդիմություն երկխոսության հարցում իշխանական կողմի արձագանքը գնահատելով՝ «Ժառանգություն» խմբակցության քարտուղար Կարինե Հակոբյանը նշեց. «Ամիսներ շարունակ, երբ ընթերցում էի երկու կողմի մեկնաբանությունները, հասկացա, որ այս ամենը հետևանք է մեր չկայացած քաղաքական դաշտի, որովհետև ընդդիմություն և իշխանություն համագործակցությունը պետք է ինստիտուցիոնալ բնույթ կրի, ոչ թե լինի մեկանգամյա միջոցառում»։ Կ.Հակոբյանի խոսքով՝ քաղաքական դաշտը երբեք չի կայանա, քանի դեռ իշխող կուսակցությունն ընդամենը լուծում է իր իշխանության երկարակեցության հարցը. «Երկխոսությանը անդրադառնալով՝ ուզում եմ ասել, որ դա հիշեցնում է պոկեր խաղը, որտեղ կողմերից վստահորեն երկուսը, չունենալով իրենց ձեռքին իրական խաղաքարտ, ստիպված են դիմել բլեֆի, և մոլորության մեջ գտնվողը հասարակությունն է։
ԱԺ ՀՀԿ խմբակցության անդամ Հովհաննես Սահակյանն իր խոսքում նշեց, որ իշխանությունը փորձում է քաղաքական դաշտ ներմուծել առողջ երկխոսության և բանավեճի կուլտուրան. «Մենք ներքաղաքական իրավիճակում ուզում ենք կայունություն մտցնել, «տապորային» լուծումները ընդունելի չենք համարում»,- հայտարարեց պատգամավորը՝ ի հեճուկս որոշ քաղաքական ուժերի և ուժիկների, որոնք փորձում են դրան տարբեր քաղաքական գնահատականներ տալ:
Կարինե Հակոբյանն իշխանություն-ընդդիմություն հարաբերությունները համեմատեց մանկապարտեզային խաղի հետ՝ հայտարարելով, թե աջ ձեռքը չգիտի՝ ինչ է անում ձախը: Իսկ Հովհ. Սահակյանը հակադարձեց, թե ինչպես կարող է «հինգ հոգանոց» «Ժառանգությունը» մեղադրել իշխանություններին անկազմակերպ լինելու մեջ, եթե չի կարողանում կողմնորոշվել իր ներքին կուսակցական հարցերում:
Ըստ Կ.Հակոբյանի՝ պետությունը ոչ միայն չի բուժում երկրին պատուհասած հիվանդությունը, այլև կողքից խնդիրներ է ստեղծում, որպեսզի հիվանդի վիճակն ավելի վատանա։
