Քաղաքագետ Գագիկ Համբարյանը կարծում է, որ վարչապետ Տիգրան Սարգսյանի հրաժարականը սպասելի լուր էր: «Առաջին լրատվական»-ի հետ զրույցում Համբարյանը նշեց, որ դեռ օրեր առաջ ինքը կանխատեսել էր՝ վարչապետը երկար չի մնա, որովհետև սա ավելի շատ ոչ թե ՀՀ իշխանությունների խնդիրն է, այլ Ռուսաստանի:
«Ես նշել էի, որ Ղրիմի հարցերը և Ռուսաստանի… ճիշտ է, ՌԴ-ի խնդիրները քիչ թե շատ լուծելուց հետո իշխանություններն անպայման կձեռնարկեն քայլեր, որպեսզի նաև Հայաստանում փոփոխություններ կատարեն իրենց ցանկությամբ, և այդ «իրենց ցանկությամբ»-ի ժամանակն արդեն եկել է. դրա վառ ապացույցը եղավ այսօր վարչապետի հրաժարականի մասին հայտարարությունը:
Մեր վարչապետն էնքան կոպիտ սխալներ, բացթողումներ ունի, հիմա մարդիկ կարող են միամտաբար մտածել, թե պատճառը կենսաթոշակային բարեփոխումների ծրագիրն է, պարտադիր հետպահումները մարդկանց աշխատավարձերից, այն, որ ՍԴ-ում կառավարությունը պարտություն կրեց: Մենք ունենք ավելի խայտառակ դեպքեր՝ վարչապետի հետ կապված»,- ասաց նա՝ հիշեցնելով օֆշորային հայտնի պատմությունը, ապա հավելելով՝ արդեն նախկին վարչապետը որքան էլ հայտարարի, որ ինքը դրա հետ կապ չունի, տեղեկացված մարդիկ բացարձակապես չեն հավատա:
Քաղաքագետի խոսքով՝ վարչապետն ավելի վատ բաների միջով է անցել և շատ լավ պահպանել է իր դիրքերը: Համբարյանը կարծում է՝ վարչապետի հրաժարականի պատճառն է «ներքաղաքական պլյուս Հայաստան-Ռուսաստան հարաբերություններ»: Համբարյանի համոզմամբ՝ միայն ներքաղաքական խնդիրների պատճառով Սերժ Սարգսյանը չէր հրաժարվի Տիգրան Սարգսյանի ծառայություններից: «Տիգրան Սարգսյանն ի սկզբանե եղել է Եվրոպայի սիրելի քաղաքական գործիչներից մեկը Հայաստանում, և նրանք շատ մեծ սիրով մշտապես բավական մեծ գումարներ էին պարտքով տալիս ՀՀ-ին։ Կարելի է ասել՝ Տիգրան Սարգսյանը մեր կարևորագույն պարտք վերցնողներից մեկն էր եվրոպական խոշորագույն ստրուկտուրաներից, Եվրոպական բանկից, Արժույթի միջազգային հիմնադրամից»,- ասաց նա:
