ԱՄՆ նախկին նախագահ Բիլ Քլինթոնը ABC հեռուստաընկերության երեկոյան թոք շոուի ժամանակ պատմել է ոչ երկրային քաղաքակրթություններ հանդեպ իր վերաբերմունքի մասին: Այս մասին հայտնում է ABC-ն:
Քլինթոնը պատմել է, որ նախագահական պաշտոնը զբաղեցրած ժամանակ իր օգնականների հետ եղել է Նևադա նահանգում, այսպես կոչված, «Տարածք 51»-ում (Area 51)՝ համոզվելու ռազմական օբյեկտում այլմոլորակայինների բացակայության մեջ:
Area 51-ը հանդիսանում է այնքան գաղտնի ռազմաբազա, որ ԱՄՆ իշխանությունները երկար ժամանակ հրաժարվել են խոստովանել նույնիսկ դրա գոյության փաստը: Ռազմական օբյեկտի շուրջ նման գաղտնիությունն այն վերածել է դավադրության բազմաթիվ տեսությունների առարկայի, այդ թվում՝ կապված չճանաչված թռչող օբյեկտների հետ:
Քլինթոնը նաև պատմել է, որ հետաքրքրվել է Նյու-Մեքսիկո նահանգի Ռոզուել քաղաքի պատմությամբ: Քաղաքին համաշխարհային ճանաչում է բերել 1947-ին ՉԹՕ-ի ենթադրյալ կործանումը: Նախկին նախագահի խոսքով՝ ինքն ուսումնասիրել է միջադեպի հետ կապված բոլոր փաստաթղթերը և պարտադիր կպատմեր համաքաղաքացիներին այլմոլորակայինների գոյության մասին, եթե ունենար հավաստի տեղեկություններ:
Քլինթոնը վստահ է, որ վերերկրային քաղաքակրթություններ գոյություն ունեն: «Ես չեմ զարմանա, եթե երբևէ մեզ մոտ այլմոլորակայիններ թռչեն: Միայն հուսով եմ, որ նրանք իրենց չեն պահի այնպես, ինչպես «Անկախության օրը» ֆիլմում»,- նշել է նա՝ հիշեցնելով աղետալի ֆիլմի մասին, որը նկարահանվել է 1996-ին ռեժիսոր Ռոլանդ Էմերիպի կողմից: Համաձայն սյուժեի՝ ագրեսիվ տրամադրված այլմոլորակայինները գալիս են Երկիր՝ այն մարդկանցից մաքրելու համար:
Խոսելով այլմոլորակայինների այցից մարդկության համար օգուտի մասին՝ Քլինթոնը հավելել է, որ ներխուժումը դրսից կմիավորի պառակտված աշխարհը, քանի որ Երկրի բոլոր բնակիչները հավասար են այլմոլորակային սպառնալիքի առջև:
