Արժույթի միջազգային հիմնադրամն արդեն տեսնում է ԵՄ-ի ու ԱՄՆ-ի կողմից Ռուսաստանի նկատմամբ սահմանված պատժամիջոցների հետևանքները: Այս մասին PBS հեռուստաալիքի հետ հարցազրույցում հայտարարել է հիմնադրամի ղեկավար Քրիստին Լագարդը: Նրա խոսքով՝ այդ հարցում ԱՄՀ-ն ուշադրություն է դարձնում տնտեսական ցուցիչներին:
Հետևանքների համար բավական են ոչ միայն պատժամիջոցները, այլև դրանց մասին խոսակցությունները, երբ փոփոխությունները կապված են սպասումների հետ՝ նշել է նա: Եթե նայենք վերջին ամիսներին Ռուսաստանից կապիտալի արտահոսքի ծավալին, արժութային քաղաքականությունը փոխելու վերաբերյալ ռուսական ԿԲ-ի որոշմանը, դա նշանակում է, որ հետևանքներն արդեն կան՝ ասել է Լագարդը: Նա հատուկ ուշադրություն է հրավիրել այն բանին, որ կապիտալի զանգվածային արտահոսքը հստակ մատնացույց է անում, որ գումարը դուրս է գալիս երկրից:
Ադրադառնալով Ուկրաինային՝ նա նշել է, որ Ուկրաինային անհրաժեշտ է ԱՄՀ-ի ու միջազգային հանրության աջակցությունը բարեփոխումների անցկացման և ֆինանսական շուկաներ վերադառնալու համար: Լագարդն ընդգծել է, որ ԱՄՀ-ն օգնություն է ցուցաբերում երկրներին՝ պայմանով, որ նրանք իրենք էլ կանեն ամեն ինչ իրենց տնտեսության վերականգնման համար:
Ուկրաինան պետք է նաև լուծի կոռուպցիայի խնդիրը, վերականգնի վերահսկելիությունը, լուծի էներգակիրերի արդար արժեքի խնդիրը, վերականգնի հարկային դաշտն ու անցկացնի կառուցվածքային բարեփոխումներ, որոնք կօգնեն վերականգնել տնտեսությունը:
