Ֆեյսբուքում գործում է «Անկախության մարաթոն․ Հաղթանակած» էջը, որը պատմում է երիտասարդական մի նախաձեռնության մասին, որն ակտիվ գործունեություն է ծավալում մարզերում՝ հայրենասիրական գաղափարների, հրապուրիչ կարգախոսների ներքո։
Մեր օրերում նման նախաձեռնությունների պակաս չկա ու այս մեկին հատուկ չէինք անդրադառնա, եթե ստույգ տեղեկություն չունենայինք, որ դրա հետևում կանգնած է Ռոբերտ Քոչարյանի թիմը։
Տեխնոլոգիան ու մեթոդաբանությունը շատ ծանոթ են ու հարկ է խոստովանել, որ դրանք որոշակի արդյունավետություն ունեն հասարակության անտեղյակության համատեքստում։
Երկրորդ նախագահի դեմ ձևավորված է հանրային լայն կոնսոլիդացիա ու կոնսենսուս, ու նա իր դեմքով չի կարողանում անգամ կուսակցություն ձևավորել՝ չնայած այդ մասին հայտարարել էր իր հարցազրույցներից մեկում։ Քոչարյանը խորհրդարանական ընտրություններին անգամ միջնորդավորված չմասնակցեց, որովհետև նույնիսկ հին համակարգի հետ ասոցացվող քաղաքական ուժերը հրաշալի գիտեն, որ երկրորդ նախագահի անվան որևէ ասոցիացիա քաղաքական ֆիասկոյի ամենակարճ ճանապարհն է։
Վերջին կալանավորումից մեկ օր առաջ Ռոբերտ Քոչարյանը շրջանառու դարձրեց «Կոնսենսուս՝ մինուս մեկ» բանաձևը, սակայն դա էլ չաշխատող տեխնոլոգիա է, որովհետև երկրորդ նախագահը հրաշալի հասկանում է, որ այսօրվա Հայաստանում քաղաքական և հանրային ցանկացած կոնսենսուսի իրական թիրախը հենց ինքն է ու թերևս քարոզչական այս հնարքն ազդեցություն չգործեց անգամ Ռոբերտ Քոչարյանի սակավաթիվ կողմնակիցների վրա։
Քոչարյանի մի քանի տասնյակ աջակիցների ցույցերը դատարանների պատերի տակ որևէ ազդեցություն, անգամ՝ մանիպուլյատիվ հարթության վրա, չեն գործում, որովհետև աշխատում է բումերանգի օրենքը ու դատարանի շենքի մոտ ինքնաբուխ հավաքվում են անհամեմատ ավելի մեծ թվով մարդիկ, ովքեր պահանջում են համարժեք պատասխանատվության ենթարկել երկրորդ նախագահին՝ նախկինում գործած հանցագործությունների համար։
Ըստ այդմ՝ Քոչարյանի թիմին մնում է կողմնակիցներ կամ հետևորդներ հավաքագրել ակնհայտ մանիպուլյացիոն հնարքներով, երբ երիտասարդները կուլ են տալիս հայրենասիրական կարգախոսների «խայծը», իսկ հետո հայտնվում են երկրորդ նախագահին «հերոսացնողների» շարքերում։
«Անկախության մարաթոն․ Հաղթանակած» նախաձեռնությունը հենց դրանցից մեկն է, որը ստեղծվել է եկեղեցու երիտասարդական կառույցների բազայի հենքով, սակայն ակտիվորեն ֆինանսավորվում է Ռոբերտ Քոչարյանի թիմի կողմից։
Թե կոնկրետ ինչ իրական նպատակներ է հետապնդում այս նախաձեռնությունը ու հետո ինչ տրանսֆորմացիաներ կապրի՝ դժվարանում ենք ասել, որովհետև՝ մեծ հաշվով, Քոչարյանի խնդիրը ոչ թե իշխանության ու Նիկոլ Փաշինյանի, այլ՝ հասարակության հետ է։ Այլ խոսքով՝ նույնիսկ ամենալուսավոր նախաձեռնությունը ֆանտաստիկ արագությամբ դևալվացվելու է՝ Քոչարյանի հետ ասոցացվելուց հետո։
Ուշագրավ է, որ Քոչարյանի թիմի ցանցային աշխատանքը հար և նման է մի շարք աղանդների գործելաոճին, որոնք զբաղված են «մարդաորսով»՝ մանիպուլյատիվ հնարքներով։
