«Ինձ թվում է՝ սիրիական հակամարտությունից շահեկան դիրքերով ոչ մեկ դուրս չի եկել և չի կարող գալ, առաջին հերթին տուժել է սիրիացի ժողովուրդը: Այն, ինչ տեղի է ունենում Սիրիայում, հավասարազոր է ցեղասպանության, թեպետ այժմ իրավիճակը քիչ թե շատ հանգիստ է»,-«Առաջին լրատվական»-ի հետ զրույցում ասաց տարածաշրջանային հարցերով փորձագետ Կարեն Վերանյանը:
Նրա կարծիքով՝ հակամարտության խաղաղ հանգուցալուծումը շատ հեռու է, նույնիսկ եթե Իդլիբի ուղղությամբ հակամարտող կողմերից որևէ մեկը հաջողություն գրանցի, դժվար թե դա հանգեցնի հակամարտության կարգավորմանը: «Հակամարտությունը շատ երկար կտևի՝ հաշվի առնելով տարածաշրջանում Իրան-Իսրայել դիմակայությունը, ԱՄՆ-Իրան դիմակայությունը, ԱՄՆ-Թուրքիա հարաբերությունները, այսինքն՝ այս ամենը պետք է ընդհանուր թնջուկի մեջ նայել»,- հավելեց Վերանյանը:
Արաբագետ Գրիգորյանն իր հերթին նշեց, որ դեռևս վաղ է խոսել սիրիական հակամարտության հանգուցալուծումից: Հարցին, թե ինչպես Բաշար ալ-Ասադին հաջողվեց իշխանությունը պահել իր ձեռքում, մեր զրուցակիցը պատասխանեց. «Ասադների իշխանության հիմքերն էին բավականին ամուր, քանի որ Հաֆեզ ալ-Ասադն աչքի էր ընկնում բավականին հեռատես քաղաքականությամբ և լուրջ ազդեցիկ գործիչ էր ոչ միայն Սիրիայում, այլ նաև Սիրիայից դուրս: Բացի դրանից՝ որոշակի փուլում փոխվեցին հակամարտության շեշտադրումները, սկզբնական փուլում՝ տարածաշրջանի մի շարք երկրների, որոշ գերտերությունների նպատակը Բաշար ալ-Ասադին իշխանությունից հեռացնելն էր, բայց հետո գերնպատակ դարձավ ծայրահեղական իսլամական ուժերի դեմ պայքարը»:
Վերանյանի խոսքերով՝ Ռուսաստանին հաջողվեց Ւրանի օգնությամբ Բաշար ալ-Ասադին պահել իշխանության: «Եթե վերցնենք Բաշար ալ-Ասադի անձը, վստահաբար կարող ենք ասել, որ ինքը չէր կարողանա դիմանալ բոլոր մարտահրավերներին, առավել ևս այսօր, երբ ունենք քանդված Սիրիա»:
Ինչ վերաբերում է Բաշար ալ-Ասադի ճակատագրին, Գրիգորյանն այս առումով վատատես է. «Չեմ կարծում, որ նա կշարունակի իշխանության ղեկին մնալ, ամեն դեպքում որոշակի փոփոխություններ կլինեն, կլինեն անցումային իշխանություններ, կառավարություն, որից հետո պարզ կլինի՝ ով է ղեկավարելու Սիրիան»:
Առավել մանրամասն՝ տեսանյութում։
