Կատալոնական «Բարսելոնա»-ի դարպասապահ Վիկտոր Վալդեսը հույս է հայտնել, որ հնարավորինս շուտ կվերադառնա խաղադաշտ: Հիշեցենք, որ դարպասապահը ծանր վնասվածք էր ստացել Իսպանիայի առաջնության 30-րդ տուրի «Սելտա»-ի դեմ հանդիպմանը: Խաղից հետո նրա մոտ ծնկի խաչաձև կապանների լուրջ վնասվածք էր ախտորոշվել, ինչի պատճառով Վալդեսը այլևս դաշտ դուրս չի գա այս մրցաշրջանում, բացի այդ չի կարողանա մասնակցել Բրազիլիայում ամռանը կայանալիք ֆուտբոլի աշխարհի առաջնությանը:
«Վիրահատությունը բարեհաջող է անցել: Ես ինձ լավ եմ զգում,- Վալդեսի խոսքերն է մեջբերում Footbal Espana-ն: – Չեմ համբերում տուն վերադառնալ, որպեսզի ժամանակ անցկացնեմ ընտանիքիս կողքին և հնարավաորինս կարճ ժամկետում վերադառնամ խաղադաշտ: Ցանկանում եմ շնորհակալություն հայտնել նրանց, ովքեր վերջին օրերի ընթացքում ինձ սատարողական նամակներ էին ուղարկել: Հաճելի է, որ այդքան շատ մարդ է անհանգստանում իմ մասին: Հիմա ամբողջ ուժերս եմ ներդնելու, որպեսզի ինչքան հնարավոր է շուտ վերադառնամ խաղադաշտ»:
