Քրեական ենթամշակույթի դեմ պայքարին ուղղված օրենսդրական նախաձեռնությունը 1990-ական թվականների գործելաոճի հետ կապ չունի, փոխարենը կապ ունի որոշ երկրներում օրենսդրական փոփոխությունների հետ, մասնավորապես, Վրաստանի և Ռուսաստանի։ Այս մասին «Առաջին լրատվական»-ի հետ զրույցում նշեց ԱԺ «Իմ քայլը» խմբակցության պատգամավոր Արմեն Խաչատրյանը։
«Այդ երկրներում եղել են այդպիսի նախագծեր, քրեական ենթամշակույթին հարելը քրեականացվել է, որի արդյունքում Հայաստանը կարող է դառնալ քրեական ենթամշակույթը կրող անձանց համար տրանզիտ երկիր։ Ինչ-որ տեղ այս նախագծի ընդունումը պարտադրված է, որպեսզի նախականխենք Հայաստանում նման կուտակումները»,-ասաց Արմեն Խաչատրյանը։
Ինչ վերաբերում է ՔԿՀ-ներում անհնազանդության դրսևորումներին՝ կապված այդ օրենսդրական նախաձեռնության հնարավոր ընդունման հետ, պատգամավորն ասաց, որ այդ առումով որևէ մտահոգություն չունի. «Մարդիկ կարող են արտահայտել իրենց դիրքորոշումները ցանկացած երևույթի, այդ թվում օրենսդրական նախաձեռնության նկատմամբ, սակայն հակաօրինական արարքներ չեն կարող թույլ տալ։ Եթե այդպիսի արարքներ թույլ կտամ, ապա պետք է օրենսդրությամբ սահմանված կարգով վարչական, նաև քրեական ներգործության միջոցներ կիրառել։ Որևէ մեկը չի կարող պետության քաղաքականությանը ապօրինի գործողություններովդիմակայել»,-ասաց նա։