Գաղտնիք չէ, որ բարձրաստիճան պաշտոնյաները հիմնականում թաքցնում են իրենց հարստությունը: Եվ դրա համար նրանք իրենց ունեցվածքը՝ տները, մեքենաները, օբյեկտներն ու այլ գույքը գրանցում են բարեկամների կամ այլ մերձավորների անունով: Ինչպես նախկին գլխավոր դատախազն էր ասում՝ քեռու մարդու անունով:
Վերջին տարիներին բարձրաստիճան պաշտոնյաները Բարձրաստիճան պաշտոնյաների էթիկայի հանձնաժողովին են ներկայացնում իրենց գույքի ու եկամուտների մասին հայտարարագրերը: Բացի այդ, ընտրություններից առաջ նրանք նման հայտարարագրեր են ներկայացնում նաև Կենտրոնական ընտրական հանձնաժողովին: Եվ այդ հայտարարագրերով մասամբ կարելի է պատկերացնել, թե ինչ ունեցվածք ունեն մեր պաշտոնյաները:
Այդ տվյալների համաձայն` Ազգային ժողովի նախագահ Հովիկ Աբրահամյանն ունի բավականին մեծ ունեցվածք: Էթիկայի հանձնաժողովի կայքի 2013թ. տվյալների համաձայն` ԱԺ նախագահի դրամական միջոցները կազմում են 290 մլն դրամ և 2 մլն դոլար: Նա 45 մլն դրամ եկամուտ է ստացել գյուղմթերքի իրացումից: Հ. Աբրահամյանի կինը՝ Ջուլիետա Աբրահամյանն իր ամուսնուց հարուստ է և իր հաշվին ունի 300 մլն դրամ և 2 մլն 900 հազար դոլար: Տիկին Աբրահամյանը նույնպես նույն ժամանակաընթացքում գյուղմթերքի իրացումից ստացել խոշոր եկամուտ՝ 48 մլն դրամ:
Այս հայտարարագրերում տեր և տիկին Աբրահամյանները որևէ անշարժ կամ շարժական գույք՝ բնակարան, օբյեկտ, հողատարածք, մեքենա կամ ընկերություն չեն հայտարարագրել: Այսպիսով, նրանք ցույց են տվել, որ ոչ տուն, ոչ էլ մեքենա չունեն: Իսկ թե իրացված գյուղմթերքն ինչպես կամ ինչ ընկերության շրջանակներում են ձեռք բերել կամ վաճառել, հայտնի չէ:
2012թ. խորհրդարանական ընտրություններից առաջ ԿԸՀ ներկայացրած հայտարարագրի համաձայն` Հ. Աբրահամյանը երեք բնակարան ունի, որոնցից մեկը Թումանյան փողոցի վրա է և ունի 276 քմ մակերես, մյուսը գտնվում է Շմիդտ փողոցում՝ 146 քմ, և երրորդը Տերյան փողոցում՝ 260 քմ: Աբրահամյանների այս հայտարարագրերում, սակայն, նշված չի Ազատության պողոտայի սկզբնամասում՝ Հաղթանակի զբոսայգու ուղիղ դիմացը գտնվող նրա հսկա և շքեղ առանձնատունը, որտեղ հիմա նրանք ապրում են: Հիշեցնենք, որ դա այն առանձնատունն է, որը կառուցվել է Ազգային ժողովի շենքի նմանությամբ: Մամուլի հրապարակումների համաձայն` այդ տան վարդակները, պատերին արված գիպսե նախշերն ու այլ առարկաները ոսկեջրած են: Հայտարարագրված չէ նաև Ծաղկաձորում ունեցած շքեղ առանձնատունը:
Աբրահամյանները չեն հայտարարագրել նաև Ամիրյան փողոցում գտնվող իրենց հսկայական նորակառույց National հյուրանոցն ու «Իմպերիում պլազա» բիզնես կենտրոնը: Գուցե դրանք գրանցված են նրանց որդու՝ Արգամ Աբրահամյանի անունով: Բայց Հ. Աբրահամյանն, ի տարբերություն այլ պաշտոնյաների, չի հայտարարագրել իր որդու ունեցվածքը:
Հայտնի է նաև, որ Հ. Աբրահամյանը Արարատյան դաշտավայրում ունի խոշոր ձկնաբուծարաններ: Բացի այդ, նրան պատկանող ընկերություններից մեկն է ներկրում Հայաստանում սպառվող ձկան կերի հիմնական քանակությունը: Հայտնի է նաև, որ Աբրահամյանների ընտանիքը հսկայական հողատարածքներ ունի: Դա հայտնի դարձավ անցած տարի, երբ բացահայտվեց, որ նրա ընտանիքը հսկայական քանակությամբ պետության կողմից սուբսիդավորվող դիզվառելիք էր ձեռք բերել գյուղատնտեսական նշանակության աշխատանքների համար: Եվ սրանցից որևէ մեկը տեղ չի գտել Աբրահամյանների հայտարարագրերում:
Ի դեպ, մամուլի հրապարակումների համաձայն` Աբրահամյաններին են պատկանում հսկայական թվով ընկերություններ և բիզնեսներ: Ինչպես օրինակ՝ «Արտաշատ-Վինկոն» գինու գործարանը, Արտաշատ տրիկոտաժի և մեխանիկական գործարանները, Շահումյան գյուղում գտնվող Արտաշատի շարժական մեքենայացված շարասյունը, Շահումյանում գտնվող 5-րդ տրեստի ավտոպարկը, Արտաշատի կենցաղսպասարկման կոմբինատը, Արտաշատի «Սիրիուս» գործարանը, նախկին զինվորական գործարանը, որը հետագայում վերածվեց շուկայի և հիմա ամբողջապես թալանվել է, Մխչյանում գտնվող ATK-ն, ավտոձեռնարկությունը, Մխչյանի բետոնի գործարանը, Արտաշատի նախկին կենցաղսպասարկման շենքը, որը հետո դարձավ խաղատուն, «Արտաշատ» գաստրոնոմը, Արտաշատի հին բաղնիքը՝ 1 հեկտար հողատարածքով, Նարեկ, Քաղցրաշեն գյուղերի տարածքում շուրջ 200 հեկտար հողակտոր, Արարատի մարզից մինչև Սյունիքի մարզը ներառյալ՝ Co գազի տեխզննությունը, Արտաշատի շրջանում գործող 6 և բազմաթիվ շարժական գազալցակայաններ, Արտաշատի հյուրանոցն ու ռեստորանը և այլն: Սրանք նույնպես ներառված չեն նրանց հայտարարագրերում:
