Վրացական GHN լրատվական գործակալության փոխանցմամբ՝ Ռուսաստանի արտգործնախարար Սերգեյ Լավրովը հայտարարել է, որ Բուխարեստում ընդունված այն անբեկանելի որոշումը, թե Վրաստանը դառնալու է ՆԱՏՕ-ի դաշինքի անդամ, ազդել է նախագահ Միխեիլ Սաակաշվիլիի հոգեկանի վրա։
Լավրովը նաև մեկնաբանել է ամերիկյան «Մոնթերեյ» հակահրթիռային հածանավի մուտքը Բաթումի նավահանգիստ. «Դա սադրանք է։ Հասկանալի է, որ ամերիկացիները հրավիրվել էին մասնակցելու «Սիբիրիս» զորավարժություններին։ Ինչ-որ զորավարժություններ արդեն իսկ անցկացվել են Վրաստանի ափերի մոտ։
Եթե ամեն ինչ իրականացվում է Մոնտրեյի կոնվենցիայի խիստ պահպանմամբ, որը սահմանափակում է Սև ծովում օտար ռազամածովային նավատորմերի հայտնվելը, ապա այս դեպքում ոչ մի խնդիր չի կարող առաջանալ։ Բայց երբ Միջերկրական ծովում ունեցած բազմաթիվ ռազմանավերից ընտրվում է հենց «Մոնթերեյ» հածանավը, որը հագեցած է «Իջիս» հակահրթիռային համակարգով, ապա դա չի կարող խնդիրներ չառաջացնել։
Խնդրահարույց է այն, որ «Մոնթերեյը» մասնակցել է Վրաստանի տարածքային ջրերում անցկացված զորավարժություններին։ Մենք գիտենք, թե դեպի ՆԱՏՕ ինչքան անզուսպ ձգտում ունի Սաակաշվիլին, և որ ՆԱՏՕ-ի անդամ դառնալու որոշումն ազդել է Սաակաշվիլիի հոգեկանի վրա։ Ես համոզված եմ, որ բոլորը հասկանում են, թե դա ինչպիսի վնասակար դեր է խաղացել Հարավային Օսիայի վրա հարձակվելու նրա արկածախնդիր որոշման ընդունման վրա»։
