«Ազատություն» ռադիոկայանին տված բացառիկ հարցազրույցում ասել է Եվրամիության արտգործնախարարության՝ Արևելյան հարևանության ծրագրի գործադիր տնօրեն Միրոսլավ Լայչակն անդրադարձել է ղարաբաղյան հակամարտության կարգավորմանը.
«Առաջիկա շաբաթների ընթացքում պաշտոնական Բրյուսելը Հարավային Կովկաս կուղարկի իր նոր հատուկ ներկայացուցչին, որի հիմնական առաքելություններից մեկը կլինի տարածաշրջանի հակամարտությունների, այդ թվում՝ ղարաբաղյան խնդրի կարգավորմանը նպաստելը ։ Եվրամիությունը ցանկանում է մեծացնել իր դերակատարությունը հակամարտության կարգավորման գործընթացում, սակայն ոչ ԵԱՀԿ-ի Մինսկի խմբի հաշվին:
Եվրամիությունը աջակցում է Մինսկի խմբին և հակամարտության քաղաքական կարգավորումը գտնելու՝ դրա ջանքերին: Սակայն, միևնույն ժամանակ, Եվրամիության անդամ երկրների շարքում այժմ աճող համոզմունք կա, որ պաշտոնական Բրյուսելը նույնպես պետք է ակտիվ և տեսանելի քաղաքական դերակատարություն ունենա: Ղարաբաղյան խնդիրը մեր հարևանությամբ գտնվող միակ հարցն է, որի կարգավորմանը Եվրամիությունը ուղղակիորեն ներգրավված չէ: Մենք չենք կարող հարաբերություններ ունենալ մեր արևելյան հարևանների հետ և ձևացնել, թե այդ հարցը գոյություն չունի։
Այժմ Եվրամիությունը բանակցություններ է վարում ԵԱՀԿ-ի Մինսկի խմբի հետ՝ որոշելու, թե կոնկրետ ինչ քայլեր, երբ և ինչպես կարող է ձեռնարկել Բրյուսելը՝ կարգավորման ուղղությամբ: Սակայն, այս հարցի պատասխանը կախված է ոչ թե Մինսկի խմբի հետ քննարկումներից, այլ բանակցություններից։
Ներկայումս սեղանին է քաղաքական կարգավորում, որը գործունեության նոր դաշտ կբացի բազմաթիվ գործող անձանց, այդ թվում՝ Եվրամիության համար: Բրյուսելը կարող է շատ բան անել, օրինակ՝ մերձեցնել կողմերին, խթանել երկխոսությունը հասարակությունների միջեւ, եվրոպական չափանիշներ բերել: Սակայն, այդ քայլերը կախված են բանակցային գործընթացի դինամիկայից. եթե առաջընթաց լինի, Եվրամիության համար ներգրավվածության առավել մեծ դաշտ կբացվի, եթե առաջընթաց չլինի, եվրոպական ընտանիքը ավելի քիչ բան անելու հնարավորություն կունենա։
Այս հակամարտության նկատմամբ Եվրամիության հետաքրքրվածության ամենավառ ապացույցն այն փաստն է, որ շատ շուտով արտաքին քաղաքականության բարձրագույն հանձնակատար Քեթրին Էշթոնը նշանակելու է Հարավային Կովկասում Եվրամիության նոր ներկայացուցիչ: Այս նշանակումը կլինի այն միջոցը, որը հնարավորություն կտա կյանքի կոչել Եվրամիության դիրքորոշումները, շահերն ու քաղաքականությունը Հարավային Կովկասում»։
