Մենք քրեական հեղինակությունների ու այսպես կոչված օրենքով գողերի դեմ պայքարին ուղղված քրեական օրենսգրքի փոփոխություններին գնալուն պարտադրված ենք։ Այս մասին «Առաջին լրատվական»-ի հետ զրույցում նշեց ԱԺ «Իմ քայլը» խմբակցության պատգամավոր Արմեն Խաչատրյանը։
«Հարևան Վրաստանում և Ռուսաստանի Դաշնությունում այս օրենքները վաղուց ընդունված են։ Իհարկե, Վրաստանի դեպքում արդեն ազգային անվտանգության խնդիր կար քրեական հեղինակությունների հետ կապված, որովհետև գաղտնիք չէ, որ մի ժամանակ Վրաստանում պետական իշխանությունը սերտաճած էր արդեն քրեական հեղինակությունների հետ և բազմաթիվ, այդ թվում պետական հարցեր լուծվում էին քրեական աշխարհի միջոցով։ Վրաստանը բավականին ակտիվ պայքար մղելով այս ուղղությամբ, հասավ ցանկալի արդյունքի։ Նրանք նմանատիպ օրենք մտցրեցին, ոով քրեականացվեց քրեական միջավայր ստեղծելը, դրան հարելը, քրեական հեղինակություններին դիմելը, «օրենքով գող» լինելը։ Արդյունքը դրական էր»,-ասաց պատգամավորը։
Նրա խոսքով, դրանից հետո նմանատիպ օրենք ընդունեց նաև Ռուսաստանը, որից հետո Հայաստանը հայտնվել է մի իրավիճակում, երբ Վրաստանում և ՌԴ-ում քրեական հեղինակությունները, որոնք կային, արդեն ձգտում են իրենց գործունեությունը շարունակել ՀՀ-ում, քանի որ այստեղ նրանց դեմ պայքարի գործիքակազմը չկար։
«Կարող էր Հայաստանը վերածվել տրանզիտ երկրի»,-ընդգծեց պատգամավորը:
