ԱԺՄ նախագահ Վազգեն Մանուկյանը դեմ է անցումային արդարադատության իրականացմանը։ Նա tert.am-ին տված հարցազրույցում մասնավորապես նշել է, որ եթե հանկարծ արհեստականորեն անցումային արդարադատություն իրականացնենք, դա մեծ ստվեր կգցի մեր ամբողջ պետության վրա և մեծ հարված կհասցնի պետաիրավական համակարգին.«Անցումային արդարադատության անցնելու համար Հայաստանում ոչ մի նախադրյալներ չկան: Անցումային արդարադատության անցնում են այն երկրներում, որտեղ ներսում տեղի է ունեցել քաղաքացիական պատերազմ՝ կա՛մ ֆաշիստականից անցնում ես դեմոկրատական ռեժիմի, կա՛մ տոտալիտարից, որտեղ 100-ավոր բանտարկյալներ կան, անցնում ես դեմոկրատականի»,- ասել է Մանուկյանը։
Քաղաքագետ Լևոն Շիրինյանը, մինչդեռ, անցումային արդարադատության իրականացումը խիստ անհրաժեշտություն է համարում։ Նա «Առաջին լրատվական»-ի հետ զրույցում նշեց.«Քանի որ իշխանությունը նախատեսել է և գողապետություն համարվող համակարգը բացարձակ կրախ է ապրել, ուզեն-չուզեն՝ անցումային արդարադատությունը պետք է այս կամ այն կերպ իրականացնել։Իշխանությունն այսօր ամուր է, բացի քրեաօլիգարխիկ նախկին համակարգից այլ խոչընդոտներ չեն լինի։ Անվտանգության ուժերը իշխանությանն են, հետևաբար դիմադրությունը կլինի վիրտուալ»։
Ըստ Շիրինյանի՝ անցյալի քաղաքական ուժերը, որոնք խուսափում են արդարադատությունից՝ վախ ունեն ու փորձում են այդ վախը տարածել հասարակության վրա. «Գողապետությանը սպասարկող համակարգ չի կարող գոյություն ունենալ, անցումային արդարադատությունը խիստ անհրաժեշտություն է։ Այդ ուժերի ու գործիչների վախները պետք է չափել։Գողապետությունը միանշանակ պետք է ոչնչացվի»։
Մեր զրուցակիցն ընդգծեց.«Ես իրավագետ չեմ, բայց դա պարտադիր չէ հասկանալու, թե ինչու են նախկին ուժերն այդքան սարսափած ու ինչու են այդ սարսափը տարածում։ Ինչի՞ն են դեմ, երկիրը պետք է առաջ գնա»։
Քաղաքացիական պատերազմ, ըստ Լևոն Շիրինյանի, Հայաստանում չի եղել և չի լինելու.«Սկզբից Ռոբերտի վրա էին հույս դրել, իսկ նա ջախջախվեց, քաղաքական ակտիվություն չեղավ։ Հիմա Գագիկ Խաչատրյանն է ուղեբեռը վերցրել ու գնացել խուց, հուսահատ քայլեր են անում։ Հայաստանում քաղաքացիական պատերազմ լինել չի կարող։ Այդ մարդիկ, հավանաբար Վազգեն Մանուկյանը ևս, անցյալի իշխանության կերտիչներից է, պրագմատիզմի հիմնադիր հայրը, որը վերածվեց գողության։ Նա այդ ակունքներում է և այդ պատճառով էլ դիմադրում է։ Հայաստանը գողապետությանը հրաժեշտ է տալիս, ինչքան էլ շատերի համար ցավալի լինի։Մի ժամանակ էլ Ռուսաստանով, Պուտին պապայով էին վախեցնում։ Պարզ է, որ հիմա ժողովրդի մեջ դժգոհություն կա, բայց այնպես չէ, որ ժողովուրդն անցյալի համակարգն է տենչում։ Հակոբ Պարոնյանն ասել է.« Առաջ գոռալով, հետ ենք գնում»։ Նրանք էլ այդ տրամաբանությամբ են ուզում շարժվել»։