ՀՀ նախագահի խորհրդական Թևան Պողոսյանը իր հարցազրույցներից մեկում նշել է, որ ոմանք մոռանում են կամ տեղյակ չեն, որ ժամանակին օտարերկրյա ընկերություններից մեկի կողմից Լոնդոնի արբիտրաժային դատարանում Հայաստանի դեմ ներկայացված հայցի քննարկման գործընթացում Արմեն Սարգսյանը ակտիվ ու գործնական մասնակցություն է ունեցել մեր երկրի շահերի պաշտպանությանը:
Այս առնչությամբ Մարդկային զարգացման միջազգային կենտրոնի ղեկավար Թևան Պողոսյանը «Առաջին լրատվական»-ի հետ զրույցում նշեց. «Ընդամենը իմ պարտքն եմ համարել հիշեցնել, որ կա նաև այսպիսի փորձ, և այնպես չէ, որ Հայաստանի Հանրապետությունը երբևէ չի մասնակցել արբիտրաժին»:
Նրա խոսքով՝ պարզ է, որ արբիտրաժ դիմելու դեպքում կլինեն հետևանքներ, սակայն դրանց ցանկացած սցենարի պետք է պատրաստ լինել. «Ես ուրախ եմ, որ Ամուլսարի շուրջ դիսկուրս է ընթանում. սա աննախադեպ իրավիճակ է, երբ մենք նախապես սկսում ենք քննարկել: Սակայն հարցը շատ հաճախ պրիմիտիվացվում է՝ բացե՞լ, թե՞ չբացել: Մինչդեռ պետք է քննարկենք սցենարների հետևանքները, ոչ թե բացել-չբացելու խնդիրը»:
Թևան Պողոսյանը հավելեց՝ եթե պատկերացնենք, որ հանքը չի բացվելու, այդ դեպքում մնացած հանքարդյունաբերության հանդեպ ինչպիսին է լինելու վերաբերմունքը. «Հասկանալի է, չէ՞, որ մեկ օրում փակել հնարավոր չի լինելու»:
Մեր զրուցակիցը առաջ է քաշում տարբեր հիպոթետիկ սցենարներ և նկատում, որ կարևոր է դրանց մասին խոսելը, ոչ թե բացել-փակելու. «Լիցենզիան տրված է եղել, հիմա խնդիրը այնպիսի լուծում գտնելն է այսօր, որ հաջորդ 10-15-20 տարիներին այդ որոշումից կարողանանք միասնական օգտվել՝ ի շահ Հայաստանի»:
Հարցազրույցն ամբողջությամբ՝ տեսանյութում:
