Այսօր վարչապետ Նիկոլ Փաշինյանը շրջել է Ջերմուկում, հանդիպել ջերմուկցիներին, տարբեր համայնքի բնակիչներին։ Ջերմուկում իր ելույթում վարչապետը նշել է, որ այս հարցի լուծումը կարող է հենված լինել ՀՀ հավասարակշռված շահի վրա․ «Եթե պարզվի, որ ջուրը կեղտոտվելու է, օդը կեղտոտվելու է, հողը կեղտոտվելու է, աղմուկ և փոշի է լինելու, եթե պարզվի, որ այդպես է, հանքը չի կարող շահագործվել, իսկ եթե պարզվի, որ այդպես չէ, դա ուրիշ իրավիճակ է»,-ասել է վարչապետը։
Ջերմուկցիները վարչապետի այցը դրական են գնահատում։ Ջերմուկ համայնքի բնակիչ Շիրակ Բունիաթյանը, «Առաջին լրատվական»-ի հետ զրույցում դրական գնահատելով վարչապետի այցը, նշել է՝ կառավարությունը՝ հանձինս վարչապետի, միտված է այս հարցը լուծել ժողովրդավարական ձևով․ «Նա եկել էր այստեղ ժողովրդի կարծիքը լսելու, հասկանալու՝ այս պայքարը ինչ է, քանի որ այստեղ շահարկումներ կային, թե մի խումբ է ուղղորդված պայքարում։ Եվ հիմա ուրախ ենք, որ եկավ տեսավ, թե ինչ է Ջերմուկը՝ իր բիզնես պոտենցիալով, իր առողջարանով։ Ջերմուկը աշխարհին տալու բան ունի, սա զբոսաշրջային քաղաք է»։
Այնուամենայնիվ, այս այցից հետո էլ ջերմուկցիների մոտ որևէ դիրքորոշում չի փոխվել։ «Մենք հարգում ենք վարչապետին, մենք մասնակցել ենք հեղափոխությանը, մենք համարում ենք Ամուլսարը հեղափոխության շարունակություն, ժողովրդավարության հաստատում Ամուլսարում»,- ասել է Շիրակ Բունիաթյան։
Այս այցով, նրա խոսքերով, ոչ թե մեկս մյուսին բան ուներ համոզելու, այլ ճանաչողական այց էր վարչապետի համար Ամուլսարի իրական խնդրին։
«Վարչապետը միտված է հարցը լուծել օրենքի սահմանում, ասում է՝ կապ չունի, որ նախկին իշխանությունն է տվել այդ թույլտվությունը, բայց այսօր գերակա օրենք են մարդու իրավունքները, մարդիկ դուրս են եկել պայքարելու իրենց իրավունքների համար։ 400 միլիոն դոլարի ներդրումների մասին է խոսվում, այս թվերը ուղղակի ուռճացված են, բացի դրանից՝ գումարի չափը էական չէ, մեր սոցիալ-տնտեսական անկախությունն է դրված նժարին»,- ասել է Շիրակ Բունիաթյանը՝ հավելելով, որ բնակչության կամքից անկախ փորձ է կատարվում տնտեսական մոդելը փոխել, ինչին համայնքը պատրաստ չէ և չունի դրա ցանկությունը։ Վերջում էլ հավելել է․ «Մենք Ամուլսարի ճակատագիրը վերջնական որոշել ենք, մնում է՝ կառավարությունը լեգիտիմացնի այդ որոշումը»։
Ջերմուկի բնակիչ Ահարոն Արսենյանն էլ, «Առաջին լրատվական»-ի հետ զրույցում անդրադառնալով վարչապետի այցին Ջերմուկ, նշել է, որ վարչապետը ամեն ինչ անում է խնդրին իրավական կարգավորում տալու։
«Ցանկացած փաստարկի մենք հակափաստարկ էինք բերում, մենք մեր աչքով են տեսել, թե ինչպես է այդ կազմակերպությունը վարվում մեր բնության, մեր ջրերի, Ջերմուկում մարդու հետ։ Հետագա քայլերը՝ սպասելու ենք մինչև շրջակա միջավայրի նախարարության հայտարարությանը։ Նախ՝ մենք չենք տեսել այն ստանդարտները, որոնք հայտարարում են պատգամավորները, կառավարությունը, մեզ որևէ մեկը չի կարող տալ երաշխիք, որ 200 տարի ամենօրյա վերահսկողություն կլինի, որևէ մեկը չի կարող ասել, որ տասը տարի հետո կգա այնպիսի կառավարություն, որը ասի՝ հաջորդ կառավարությունը ինչպես կվարվի՝ ո՛չ վարչապետը, ո՛չ «Լիդիանը», ո՛չ «Էլարդը», ոչ էլ առավել ևս Քննչական կոմիտեն»։
Նրա խոսքերով՝ ի վերջո, իրենք կարողացան հասնել նրան, որ Ամուլսարի համար պայքարում են բնակիչները․ «Ասացինք՝ մենք բնապահպաններ չենք և բնապահպանությունից մեզ հետ մի խոսիր, պարոն վարչապետ։ Այն, ինչ ունենք այսօր, արբիտրաժի վտանգ և այլն, դա ունի մեկ մեղավոր՝ տվյալ ընկերությունն է, որ հաշվի չի առել, որ չի կարելի արհամարհել ժողովրդի իրավունքը․ «Մենք նոր կառավարության հետ պետք է պայքարենք հին կառավարության և այդ ընկերության դեմ, և նրանց դեմ, ովքեր թույլտվություն են տվել այդ ընկերությանը»։