Ադրբեջանական ANS PRESS-ի փոխանցմամբ՝ Ադրբեջանը պաշտոնապես նոտա է հղել Աֆղանստանի իշխանություններին՝ խնդրելով աջակցել Քաբուլի մոտ կործանված ադրբեջանական ինքնաթիռի անձնակազմի դիակները վերադարձնելու հարցում։ Այս մասին հայտարարել է Պակիստանում ու Աֆղանստանում Ադրբեջանի դեսպան Դաշգըն Շիկարովը։
Վերջինիս խոսքերով՝ ադրբեջանական ինքնաթիռի կործանման պատճառները պարզելու նպատակով Ադրբեջանից Աֆղանստան մեկնած հատուկ հանձնաժողովին դեռևս չի հաջողվել հասնել դեպքի վայր.
«Թեև կոալիցիոն ուժերը 300 զինվոր են տրամադրել ադրբեջանական հանձնաժողովին ուղեկցելու համար, այնուամենայնիվ, դեպքի վայրում իրականացվող հակաահաբեկչական միջոցառումների պատճառով դեռևս չի հաջողվել հասնել այնտեղ»։
Հիշեցնենք, որ օրեր առաջ «Թալիբան» շարժման ներկայացուցիչ Զաբիհուլահ Մուջահեթը հայտարարեց, որ իրենք են կործանել ադրբեջանական Ил-76 ինքնաթիռը, քանի որ այն զենք էր փոխադրում Աֆղանստանում գտնվող ամերիկացի զինվորականների համար։
