Լուրեր
Մենք բանանային պետություն չպետք է դառնանք. Ամուլսարի չշահագործման դեպքում ևս ռիսկեր կան

Ամուլսարի շահագործման հարցը շարունակում է մնալ հայկական լրահոսի ամենաքննարկվող թեման: Դատելով այսօրվա իրադարձություններից և քննարկումներից՝ հարկ է ընդունել, որ իրավիճակն իսկապես բարդ է, և հազիվ թե Ամուլսարի շուրջ առաջացած ճգնաժամը հնարավոր լինի հաղթահարել միայն խորհրդակցությունների կամ բնապահպանների հետ հանդիպումների ճանապարհով: Խնդիրը բազմաշերտ է, և որոշումները պետք է կայացվեն ոչ թե իրավիճակային թելադրանքով, այլ հայեցակարգային պատկերացումների հարթության վրա:

Թեմայի շուրջ «Առաջին լրատվական»-ի հետ քննարկմանն իրենց դիտարկումները ներկայացրին «Քաղաքացու որոշում» կուսակցության խորհրդի անդամ Գոռ Հակոբյանը, Լոզանի համալսարանի ասպիրանտ Արայիկ Պապյանը և «Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանը: Քննարկման մասնակիցների խոսքով՝ պետք է խուսափել ամենավատ սցենարից:

«Հարց է առաջանում. եթե Ամուլսարն այսօր չբացվի, ունե՞նք երաշխիքներ, որ երբեք չի բացվի»,- նշեց Դանիել Իոաննիսյանը՝ հավելելով, որ ինքը դեմ է Ամուլսարի շահագործմանը: Նա նան նշեց, որ մտահոգություն ունի այն առումով, որ եթե հետագայում այն շահագործվի մեկ այլ իշխանության օրոք, որը գուցե ավելի քիչ կլինի մտահոգված բնապահպանական խնդիրներով, դա կլինի վատագույն սցենարը: «Մենք պետք է խուսափենք վատագույն սցենարից»,- ընդգծեց Դ. Իոաննիսյանը: Նա նաև հավելեց, որ բացի բնապահպաններից և այլ բարեխիղճ անձանցից, կան նաև հանքարդյունաբերական շրջանակներ, որոնք ևս պայքարում են Ամուլսարի շահագործման դեմ, դա ստիպում է մտածել, որ նրանք ունեն հետին միտք՝ Ամուլսարը այսօր չշահագործի «Լիդիանը», տարիներ հետո, երբ կգա այլ կառավարություն, հանքը կշահագործեն իրենք»:

«Մենք կարծում ենք, որ Հայաստանը չպետք է գնա մետաղական արդյունաբերության զարգացման ճանապարհով»,- ընդգծեց Գոռ Հակոբյանը՝ հավելելով, որ գործող հանքերը պետք է անցնեն բնապահպանական փորձաքննություն:

Արայիկ Պապյանի դիտարկմամբ՝ պետք է կարգավորվի հանքարդյունաբերության ոլորտն ընդհանուր առմամբ. «Այսինքն՝ պետության գործողությունները պետք է վերաբերեն ոչ թե միայն «Լիդիան Արմենիա» ընկերությանը, այլ դաշտն ամբողջությամբ պետք է կարգավորվի:

Դ. Իոաննիսյանի խոսքով՝ պետք է ընդհանուր մոտեցում ունենալ՝ կապված մետաղական հանքերի շահագործման հետ: «Գուցե չարժի հիմա փակել բոլոր մետաղական հանքերը, որովհետև հարցն ունենալու է նաև տնտեսական-սոցիալական էֆեկտ, բայց պետք է սկսել կատարել գործողություններ այդ ուղղությամբ: Պետք է քննարկել՝ մենք պետություն ենք, որն ուզում է զարգանալ հանքարդյունաբերությա՞ն ուղղությամբ, մենք «բանանայի՞ն» պետություն ենք ուզում դառնալ, թե՞ պետություն, որն ուզում է ինտելեկտուալ արտադրանք տալ…»,- նշեց Իոաննիսյանը:

 

Մանրամասն՝ տեսանյութում:

 

  • Դիտումներ՝ *