Իսկական վարպետի համար սահմաններ գոյություն չունեն: Ուստի, 54-ամյա Դեմիեն Հյորսթն այս անգամ ավելի բարդ աշխատանք է ընտրել: Չէ որ այդքան էլ հեշտ չէ նկարել կտավի վրա, երբ այն շարժվում է և հռհռում:
Դեմիեն Հյորսթը հայտնի է դարձել «Natural History» նախագծի շնորհիվ, որտեղ սատկած կենդանիներին ընկղմում էր ֆորմալդեհիդի մեջ: Ցուցանմուշներից մեկը՝ վագրային շնաձուկը, նույնիսկ 90-ականների բրիտանական գրաֆիկական արվեստի և ամբողջ աշխարհի բրիտանացի նկարիչների խորհրդանիշ է դարձել: Իհարկե, դրանից հետո վարպետի հռչակն ու կարողությունը աննկարագրելիորեն աճել են:
Հյորսթի սիրած տեխնիկան կարելի է գույնզգույն բծերն անվանել. հենց այս մեթոդն է նա օգտագործել իր երիտասարդ սիրուհու վրա: Բալետի նախկին պարուհի Սոֆի Քանելն արդեն մի քանի տարի հարաբերությունների մեջ է Բրիտանիայի ամենահարուստ նկարչի հետ և այլևս չի զարմանում իր սիրելիի տարօրինակ գաղափարներից, գրում է Daily Mail-ը:
Հյորսթի անսովոր նախագծի լուսանկարը իր Instagram-ում տեղադրել է հանրահայտ լուսանկարիչ Մարիո Թեսթինոն: Նա նկարը մեկնաբանել է հետևյալ կերպ. «Ահա իմ ընկեր Դեմիեն Հյորսթի հետ, իր ընկերուհի Սոֆի Քանելին արվեստի գործի վերածելու, համատեղ աշխատանքը»:
Շատերը շնորհավորել են լուսանկարչին նման հաջողության համար, բայց գտնվել են նաև որոշ թերահավատներ, որոնց կասկածները, սակայն, չեն վերաբերել գեղարվեստական ոլորտին:
«Ինձ ուղղակի հետաքրքրում է, թե միլիարդատեր նկարչի ինչն է գրավել երիտասարդ աղջկան», «Ասում են, սերը փողով չես գնի, բայց նայեք: Չնայած, նրան երևի գրավել է նկարչի շքեղ ճաղատը», գրել են նրանք: