Իրանի իշխանությունները ցանկացած պահի կարող են գրավել Պարսից ծոցում ցանկացած նավ, նույնիսկ եթե այն ուղեկցվում է ամերիկյան կամ բրիտանական ուժերով: Այս մասին հայտարարել է Իսլամական հեղափոխության պահապանների կորպուսի (IRGC, իրանական ուժերի էլիտար ստորաբաժանումների) հրամանատար, ծովակալ Ալիրեզա Թանգսիրին, հայտնում է Al-Arabiya-ն՝ վկայակոչելով Իսլամական հանրապետության հեռուստատեսությունը:
Նա նաև շեշտել է, որ Իրանի ռազմածովային ուժերը ի վիճակի են ինքնուրույն ապահովելու անվտանգությունը Հորմուզի նեղուցում ու Պարսից ծոցում և արտաքին ներկայության կարիք չունեն: Զինվորականը նախազգուշացրել է, որ եթե Իսրայելի ուժերը ինչ-որ կերպ հայտնվեն ծոցում, դա կարող է բերել պատերազմի:
Թանգսիրին մեղադրել է ԱՄՆ-ին և Մեծ Բրիտանիային «տարբեր սցենարներ» հորինելու համար՝ իրենց ներկայությունը Պարսից ծոցում արդարացնելու համար, ինչպես նաև նշել է, որ ամերիկյան կողմը անխոհեմ կերպով մեղադրում է Իրանին նավթային լցանավերի վրա հարձակման մեջ:
