Նյու Յորքում լույս տեսնող Hyperallergic մշակութային ամսագրում վերջերս տպագրվել էր ԱՄՆ-ում բնակվող հայազգի քաղաքագետ Սիմոն Մաղաքյանի և արմատներով հրեա Սարա Փիքմանի կողմից գրված «Ռեժիմը թաքցնում է հայկական մշակույթի բնաջնջումը» ծավալուն փաստավերլուծական, հետաքննական, աշխատությունը: Այս մանրակրկիտ աշխատությունն ընդգրկում է ադրբեջանական վանդալիզմի մինչ այժմ չհրապարակված փաստեր՝ ներառյալ Ադրբեջանի իշխանությունների կողմից 2005թ. դեկտեմբերի 6-ին ընդունված հրամանագիրը, որը, ըստ էության, Ջուղայի և մյուս հայկական բեկորների ոչնչացման վերաբերյալ կարգադրում էր:
Բրիտանական The Guardian պարբերականը նույնպես անդրադարձել է Ադրբեջանում 21-րդ դարում տեղի ունեցող մշակութային եղեռնին:
«Ջուղան վերջին հուշակոթողն էր, որ ավերվեց… Ջուղայում Ադրբեջանը իրականացրեց հայկական մշակութային ցեղասպանություն»,- «Առաջին լրատվական»-ի հետ թեմայի շուրջ զրույցում այս մասին ասաց Սիմոն Մաղաքյանը, ով գործնական այցով Հայաստանում է:
Անդրադառնալով հարցին, թե ինչու է որոշում կայացրել հետաքրքրվել այս խնդրով, Սիմոն Մաղաքյանը նշեց. «Երբ ես փոքր էի, հայրս պատմում էր, թե ինչպես է Խորհրդային Միության տարիներին գնացել Ջուղայի գերեզմանոց, որտեղ մուտք ունեին միայն մասնագետները, բայց նա կարողացել է գնալ: Եվ պատմում էր, թե ինչ չնաշխարհիկ տեղ է եղել: Եվ երբ որ ես լսեցի, որ այն բնաջնջվում է, և աշխարհը թքած ունի դրա վրա, ու Հայաստանի իշխանությունները չեն կարողանում ամենաբարձր ատյաններում այդ հարցը բարձրացնել, որոշեցի այդ բեռն իմ ուսերին վերցնել»:
Մեր զրուցակցի խոսքով՝ Ադրբեջանի իշխանությունը տարիներ շարունակ զբաղվել է հայկական պատմական ժառանգության համակարգված բնաջնջմամբ: «Մեր ժամանակների ամենամեծ մշակութային ցեղասպանությունը տեղի է ունեցել Նախիջևանի տարածքում՝ 1997 և 2006 թվականների ընթացքում՝ իրագործված Ադրբեջանի ղեկավարության կողմից»: Քաղաքագետի խոսքով՝ բոլոր միջոցները պետք է ձեռնարկել, որպեսզի պահպանվի հայկական մշակութային ժառանգությունը:
Մանրամասն՝ տեսանյութում: