Ամառային տրանսֆերային պատուհանի ընթացքում հայաստանցի ֆուտբոլիստները շարունակում են մնալ ստատիկ վիճակում: Մասնավորապես, վերջին ամիսներին մեր երկրում հանդես եկող ֆուտբոլիստներից և ոչ մեկ չհայտնվեց եվրոպական ավելի բարձր կարգ ունեցող թիմերին: Կարելի է առանձնացնել թերևս Ռումյան Հովսեփյանին, որը «Փյունիկից» տեղափոխվեց Բուլղարիայի բարձրագույն լիգա:
Այնուամենայնիվ, այսօր էլ մենք մեծ հույսեր ենք կապում մասնավորապես «Փյունիկում» հանդես եկող հայ ֆուտբոլիստների հետ: Խոսքը վերաբերվում է Էրիկ Վարդանյանին, Արմեն Մանուչարյանին, Արթուր Միրանյանին: Պետք չէ մոռանալ նաև «Արարատ-Արմենիայի» կիսապաշտպանին Պետրոս Ավետիսյանին: Վստահաբար կարող ենք ասել, որ նշված ֆուտբոլիստները պատրաստ են ելույթ ունենալ շատ ավելի բարձր մակարդակի առաջնություններում: Ամառային տրանսֆերային պատուհանը մեզ համար նշանավորվեց թերևս մեկ շատ կարևոր գործարքով:
Ֆուտբոլի Հայաստանի ազգային հավաքականի հարձակվող Սարգիս Ադամյանը պայմանագիր կնքեց Բունդեսլիգան ներկայացնող «Հոֆենհայմի» հետ: Ադամյանի պայմանագիրը նախատեսված է մինչև 2022 թվականի հունիսը: Հիշեցնենք, որ Ադամյանը ելույթ էր ունենում երկրորդ Բունդեսլիգայի «Յան Ռեգենսբուրգում», որի կազմում անցկացնելով 32 հանդիպում՝ դարձել է 15 գոլի և 11 գոլային փոխանցման հեղինակ: Ըստ գերմանական լրատվամիջոցների՝ «Հոֆենհայմը» «Յան Ռեգենսբուրգին» հայ ֆուտբոլիստի տրանսֆերի համար վճարել է 1.5 միլիոն եվրո: Հենրիխ Մխիթարյանից հետո Ադամյանը երկրորդ հայաստանցի ֆուտբոլիստն է, որ հայտնվում է Բունդեսլիգայում:
Դոնեցկի «Շախտյորից» տեղափոխվելով Դորտմունդի «Բորուսիա»՝ Մխիթարյանը դարձավ այս թիմի առաջատարներից մեկը, այնուհետև ևս մեկ քայլ կատարելով՝ հայտնվեց արդեն Անգլիայի Պրեմիեր լիգայում: Հայաստանի ազգային հավաքականն այսօր ունի արդեն 2 ֆուտբոլիստների, որոնք ներկայացնում են եվրոպական թոփ առաջնություններ: Ադամյանն իսկապես վերջին տարիներին ֆանտաստիկ աճ է գրանցել: Մենք շարունակ մեծ հույսեր ենք կապում Ադամյանի հետ, բայց ազգային հավաքականում նրա խաղը այն չէ: Մասնավորապես, վերջին տարիներին Հայաստանի ազգային հավաքականում անհասկանալի պատճառներով Ադամյանը չի օգտագործում իր իրական ներուժը:Վերջին անգամ Ադամյանը Հայաստանի ազգային հավաքականի մարզաշապիկը կրել է այս տարվա մարտին Եվրոպայի առաջնության ընտրական փուլի Բոսնիայի դեմ արտագնա խաղում: Ադամյանը հերթական անգամ ցույց էր տվել թույլ խաղ՝ հիասթափեցնելով ֆուտբոլասերներին:
Հուսանք, որ վերելքի փուլում գտնվող Հայաստանի ազգային հավաքականում առաջիկա խիստ կարևոր հանդիպումներում Ադամյանն այնուամենայնիվ կօգտագործի իր պոտենցիալը:
