ԱՄՆ-ից Հայաստան է բերվել մոտ 60 հազար ավտոմեքենա: Դրանց մի մասը վաճառվել է Ղազախստանի քաղաքացիներին: Այս մասին, կառավարության միջանցքներում, հայտնել է Ղազախստանի արդյունաբերության և ենթակառուցվածքների զարգացման փոխնախարար Ամանիյազ Երժանովը, փոխանցում է NUR.KZ-ն:
«Մենք մեր տեղեկատվական խողովակներով տեղյակ ենք, որ ԱՄՆ-ից Հայաստան է բերվել շուրջ 60 հազար մեքենա: Դրանք ձեռք բերելու համար մեր քաղաքացիները Հայաստանում ժամանակավոր կեցություն են ստանում, այդ մեքենաները գնում արդեն որպես Հայաստանի քաղաքացիներ, այսինքն՝ առանց լրացուցիչ մաքսատուրքերի վճարման, և բերում Ղազախստան ու հայկական համարանիշերով արդեն մեզ մոտ վարում»,- ասել է Ամանիյազ Երժանովը:
Նրա տեղեկություններով, երկիր են բերում տարբեր մակնիշների մեքենաներ՝ «ամերիկյան մերսեդեսներից մինչև շևրոլե»:
Ընդ որում, նա դժվարացել է ասել, թե այդ մեքենաները որ թվականի թողարկման են: Հայտնի է միայն, որ դրանք գրեթե 2 անգամ ավելի էժան են այն ավտոմեքենաներից, որոնք արտադրվում են տեղում:
Սակայն, ինչպես նշել է նա, դա խնդիրներ է առաջացնում առաջին հերթին ճանապարհային ոստիկանների համար:
«Նրանք կարող են գերազանցել արագությունը, խախտել երթևեկության կանոնները և դրա համար ոչ մի պատասխանատվություն չկրել: Նրանց չեն կարող պատասխանատվության ենթարկել: Տուգանքները չեն վճարում, պատասխանատվության չեն ենթարկվում, դրան գումարած, եթե դրանք ավելի շատ ներկրվեն, ապա մարդատար մեքենաների արտադրության ավելացման մեր ամբողջ աշխատանքը, ավտովարկավորման նույն միջոցները, պարզապես անիմատ կլինեն», – նշել է նա:
Արդյունաբերության և ենթակառուցվածքների զարգացման նախարարությունն առաջարկում է. քանի որ բնակչության շրջանում պահանջարկ կա, այդ մեքենաների գնումն օրինականացնել:
«Չենք պայքարելու… Եթե բնակչությունը ցանկանում է նման մեքենաներ գնել, ապա պետք չէ պայքարել, հակառակը՝ պետք է այնպես անել, որ դա օրինական լինի և նրա համար, որպեսզի վաղը մեր քաղաքացիները օրենքի առաջ, իրավապահ մարմինների հետ խնդիրներ չունենան:
Պետք չէ մեքենաներ գնել Հայաստանում՝ ժամանակավոր հաշվառման կանգնելով, տարանցիկ համարներով ներկրել մեր երկիր, ավելի լավ է բերել, գրանցել և օրինական վարել: Իսկ հիմա ստացվում է, որ նրանք ոչ այստեղ են հարկեր վճարում, ոչ այնտեղ»,- եզրափակել է Երժանովը:
