Մարտի 24-ին ժյուրին հայտնել է աշխարհում ճարտարապետության ոլորտում ամենահեղինակավոր՝ Պրիտցերյան մրցանակի հաղթողի անունը: Այս մասին հաղորդում է Reuters-ը: 2014-ի մրցանակին արժանացել է ճապոնացի ճարտարապետ Շիգերու Բանը:
Ճապոնիայի ներկայացուցիչները Պրիտցերյան մրցանակին արժանանում են երկրորդ տարին անընդմեջ, իսկ վերջին 5 տարում ճապոնացի ճարտարապետները այդ մրցանակին են արժանանում արդեն 3-րդ անգամ:
Մրցանակի կազմկոմիտեն հայտարարելով մրցանակակրի անունը՝ առանձնահատուկ շեշտել է Բանի ստեղծագործության մարդասիրական կողմը՝ տների ստեղծում տարերային աղետից տուժածների համար:
1954թ. ծնված Բանին մեծ հռչակ բերեցին արագ կառուցվող էժան բնակելիների նախագծերը անօթևան մարդկանց համար, որոնց կառուցման համար հաճախ օգտագործվել են նաև թուղթ ու ստվարաթուղթ:
Պրիտցերյան մրցանակի դափնեկիրներին շնորհվում է 100 հազար դոլարի կտրոն և բրոնզե մեդալիոն:
