Երկու տարուց ավելի է, ինչ Սիրիայի հայաշատ Քեսաբը դարձել էր սիրիացի զինյալ ընդդիմադիրների թիրախը: Այս մասին այսօր «Առաջին լրատվական»-ի հետ զրույցում ասաց 1994-95թթ. ՀՀ ազգային անվտանգության ծառայության ղեկավար, 1992-95թթ. ՀՀ նախագահի հատուկ հանձնարարություններով դեսպան, 1991-95, 1995-99թթ. ՀՀ ԱԺ պատգամավոր Դավիթ Շահնազարյանը՝ ներկայացնելով Քեսաբի հայաթափման բուն պատճառը:
Դավիթ Շահնազարյանը հիշեցրեց, որ 2012թ. Ռուսաստանը Սիրիայի հյուսիսում՝ Քեսաբի մոտակայքում նոր ռադիոտեղորոշիչ կայան էր կառուցել, որն, ի թիվս այլ խնդիրների, Բաշար Ալ-Ասադի ռեժիմին հնարավորություն էր տալիս նաև թուրք-սիրիական սահմանի ռազմավարական նշանակություն ունեցող այդ տարածաշրջանում հետևել սիրիացի ապստամբների ողջ տեղաշարժին, քանի որ հենց թուրք-սիրիական սահմանի թուրքական հատվածում էին մինչ այդ հավաքվում Սիրիական ազատ բանակի հազարավոր ընդդիմադիր զինյալներ:
«Կայանի առկայությունը շատ վտանգավոր էր դարձրել հայաբնակ Քեսաբը, քանի որ վերջին երկու տարիների ընթացքում հենց այդ հատվածում էին հավաքվում զինյալ ընդդիմադիրները»,- ասաց Դավիթ Շահնազարյանը:
Նա ընդգծեց, որ եթե այսօր ՀՀ ԱԺ-ում կառավարությունից բացատրություններ պահանջեն, ապա առաջին հերթին պետք է պահանջեն ներկայացնել, թե ինչու ՀՀ կառավարությունը երկու տարի առաջ իր ռազմավարական գործընկերոջ՝ Ռուսաստանի առջև չբարձրացրեց այն հարցը, որ ռադիոտեղորոշիչ կայանի տեղակայումն ուղղակի սպառնալիք է հայաշատ գյուղի համար, քանի որ Քեսաբը ռադիոտեղորոշիչ կայանի հետ միասին դառնալու է սիրիացի ընդդիմադիր զինյալների գլխավոր թիրախը:
Հիշեցնենք, որ Սիրիայի հայաշատ Քեսաբը հայաթափվել է, զինյալ ընդդիմադիրներն արդեն գրավել են գյուղաքաղաքը և տարածվում են շրջակա այլ հայաբնակ գյուղերի ուղղությամբ: Քեսաբի ողջ հայությունը ստիպված է եղել լքել իր հայրենի բնակավայրը և ապաստանել ծովափնյա Լաթաքիա քաղաքում, շատերն իջևանել են իրենց ազգականների կամ բարեկամների տներում, իսկ որոշ մասն ապաստան է գտել Լաթաքիայի Սուրբ Աստվածածին եկեղեցու շրջաբակում:
Տեղեկացնենք նաև, որ ավելի վաղ ֆրանսիական Le Figaro պարբերականը գրել էր, որ Ռուսաստանի համար ռադիոտեղորոշիչ կայանի տեղակայումն իր գործընկերոջ տարածքում հնարավորություն էր տալիս նաև հետևել ՆԱՏՕ-ի՝ Թուրքիայում տեղակայված օբյեկտներին, առաջին հերթին՝ Ադանայի ամերիկյան բազային: