Սահմանադրական դատարանի շուրջ ստեղծված իրավիճակը իշխանության որոշ ներկայացուցիչներ համարում են խնդրահարույց: Տպավորություն է, որ առաջնային մանդատ ունեցող մարմինը՝ Ազգային ժողովը, լավ չի պատկերացնում իր քաղաքական տեղն ու դերը՝ սահմանադրությամբ պայմանավորված թեկուզ: «Առաջին լրատվական»-ի այս դիտարկմանը ի պատասխան՝ պատմաբան Վահրամ Թոքմաջյանը նկատեց, որ խնդիրն ավելի խորքային է, քան այն դիտանկյունը, որից մենք նայում ենք: «Վահե Գրիգորյանի նամակը՝ ուղղված տարբեր մարմիններին՝ Ազգային ժողով, նախագահի աշխատակազմ, վարչապետ, սրանով չի սահմանափակվում, սա, կարծես, թափանցիկ հանրամատչելի նամակ էր՝ ուղղված ՀՀ քաղաքացուն: Այն քաղաքացուն, որի հանրային պարտավորություննների և հանրային սահմանների կարգավորողը և երաշխավորն է Սահմանադրությունը»,- նշեց նա: Ըստ նրա՝ «Քաղաքական մեծամասնությունը պետք է ունենա հստակ դիրքորոշում, և այդ դիրքորոշումը, գոնե ինձ համար, մեկն է. կեղծիքներով անցած՝ Սահմանադրական դատարանի նախագահի աթոռը զբաղեցրած մարդը անելիք չունի»:
Ազգային ժողովը նոր Սահմանադրությամբ, թերևս, պետք է ձևավորեր նոր քաղաքական օրակարգը, և ոչ թե սպասեր, որ գործադիրը ինչ-որ հարցում դիրքորոշում հայտնի, որպեսզի այդ դիրքորոշմանը համապատասխան ինքը դիրքորոշում հայտնի: Ստացվել է, սակայն, որ վերջին ամիսների ընթացքում լրիվ հակառակն է. ԱԺ-ն սպասում է գործադիրի արձագանքին, այնուհետև արձագանքում: Այս դիտարկմանը ի պատասխան՝ հրապարակախոս Հրանտ Տեր-Աբրահամյանը նշեց, որ պառլամենտական համակարգի բնական հիմքեր իրականում Հայաստանում չկան, և հիմա նույնիսկ կարևոր չեն կոնկրետ ուժերը, որ այսօր պառլամենտում ներկայացված են: Հայաստանում չկան ռեալ գործող ինստիտուցիոնալ կուսակցական կառույցներ, որոնց համար տասնամյակների ավանդույթ է պետք: Ըստ նրա՝ նույնիսկ Արևմտյան Եվրոպայում, Արևմտյան աշխարհում դասական կուսակցությունն ինքնին ճգնաժամ է ապրում, և Հայաստանում սահմանադրական փոփոխությունների թեման արդիական է դառնում. իհարկե, առանց շտապելու:
Սահմանադրական դատարանի շուրջ ստեղծված իրավիճակի վերաբերյալ հարցին ի պատասխան՝ Վահրամ Թոքմաջյանը նշեց, որ այդ հարցը պետք է լուծվի քաղղաքական Ճանապարհով:
Մանրամասները՝ տեսանյութում։
