Ավան և Նոր Նորք վարչական շրջանների ընդհանուր իրավասության դատարանում այսօր «արտակարգ իրավիճակում»՝ ամբաստանյալների ու նրանց հարազատների անեծքների, հայհոյանքների ուղեկցությամբ նախագահող դատավոր Դավիթ Հարությունյանը հրապարակեց արդեն մեկուկես տարի շարունակվող՝ «Հարսնաքարի» գործով դատավճիռը:
Դահլիճում աղմուկը սկսեց սաստկանալ, երբ դատավորը անցավ պատժաչափերի հրապարակմանը:
Հայհոյանքներն ու անեծքները այնքան ուժգնացան, որ դատավճռի վերջին մասը՝ քաղհայցի վերաբերյալ, արդեն հնարավոր չէր լսել: Դա արդեն որևէ մեկին չէր էլ հետաքրքրում, չնայած դատավորը կարողացավ գոռգոռոցի պայմաններում կանգնած մնալ ու ավարտել դատավճռի հրապարակումը:
Դատավորի և անգամ լրագրողների կողմը նետվեցին ինչ-որ առարկա, ապա պայուսակ: Դահլիճում լեփ-լեցուն ուղեկցողներն ու կարգադրիչներն անկարող էին զսպել ամբաստանյալների հարազատների մոլեգնությունը:
Մի կերպ դահլիճն ազատվեց, մարդկային զանգվածը դուրս բերվեց դատարանի շենքից:
Ըստ երևույթին նախապես դատարան հրավիրված շտապօգնության բրիգադը բժշկական օգնություն ցույց տվեց առավել վատ վիճակում գտնվող կին հարազատներին:
Գարիկ Մարգարյանը դատապարտվեց 12 տարի ազատազրկման և 100 հազար դրամ տուգանքի:
Դավիթ Ադամյանը դատապարտվեց 12 տարի ազատազրկման և 100 հազար դրամ տուգանքի:
Արթուր Բաբլոյանը դատապարտվեց 12 տարի ազատազրկման և 100 հազար դրամ տուգանքի:
Արման Բաղդասարյանը դատապարտվեց 12 տարի ազատազրկման և 100 հազար դրամ տուգանքի:
Արման Խաչատրյանը դատապարտվեց 12 տարի ազատազրկման և 100 հազար դրամ տուգանքի:
Նորայր Հայրապետյանը դատապարտվեց 12 տարի ազատազրկման և 100 հազար դրամ տուգանքի:
Դատարանը, փաստորեն, հաստատված գնահատեց նախաքննական մարմնի առաջադրած մեղադրանքները և այն, որ հանցագործությունները կատարվել են միասնական դիտավորությամբ, ինչը ամեն կերպ ջանում էր փոխել պաշտպանական կողմը, հասնել այն բանին, որ ամբաստանյալներից յուրաքանչյուրը դատապարտվի կոնկրետ արարքի համար:
Դրան էին միտված նաև դատական քննության ավարտին երեք ամբաստանյալների տված խոստովանական ցուցմունքները: Սակայն դրանք, փաստորեն, որևէ արժեք չունեցան:
Նախաքննական մարմինը բոլոր վեց ամբաստանյալներին մեղադրանք էր առաջադրել երեք հոդվածներով՝ ՀՀ քրեական օրենսգրքի 112 հոդվածի 2-րդ մասի 6-րդ, 14-րդ կետերով, 113 հոդվածի 2-րդ մասի 1-ին, 2-րդ կետերով և 118 հոդվածով:
Ըստ մեղադրանքի՝ նրանք վեցն էլ, աշխատելով «Հարսնաքար» ռեստորանային համալիրում, միասնական դիտավորությամբ ծեծի են ենթարկել համալիրի հաճախորդներ Վահե Ավետյանին, Արտակ Բայադյանին, Գարիկ Սողոմոնյանին, Արկադի Աղաջանյանին և Էդգար Նիկոյանին՝ Վահե Ավետյանի առողջությանը դիտավորությամբ պատճառելով կյանքի համար վտանգավոր ծանր վնաս, որն անզգուշությամբ առաջացրել էր նրա մահը, Արտակ Բայադյանի և Գարիկ Սողոմոնյանի առողջությանը պատճառելով միջին ծանրության վնաս՝ առողջության տևական քայքայումով, իսկ Արկադի Աղաջանյանին և Էդգար Նիկոյանին ծեծի արդյունքում մարմնական վնասվածքներ չեն պատճառվել:
Հիշեցնենք նաև, որ մեղադրողը բոլոր ամբաստանյալների համար միջնորդել էր 13 տարի ազատազրկում:
Դատավճռի հրապարակմանը ներկա չէր մեղադրանքի կողմը:
