Արևմտյան քաղաքական գործիչները ուշադիր չեն քննում պատմությունը, նրանց պատմական զուգահեռները հիմնավորված չեն՝ կարծում է Daily Mail-ի վերլուծաբան Փիթեր Հիթչենսը: Հենց նրանց անտեղյակությունն ու աղմկալի հայտարարություններն են՝ զուգորդված եվրոպական և ամերիկյան ԶԼՄ-ների «ընտրական կուրության», տանում նոր սառը պատերազմի:
Հոդվածի հեղինակը համոզված է, որ միջազգային քաղաքականությունում որոշակի դեր խաղացող հիմար և տգետ մարդիկ հաճախ են իրենց համարում խելացի և լավ տեղեկացված:
Նա մի քանի օրինակ է բերում, որոնցից մեկը վերաբերում է Հիլարի Քլինթոնին: «Նա եղել է ամերիկյան դիվանագիտության ղեկավարը, իսկ հիմա իր թեկնածությունն է դնում նախագահական ընտրություններում: Նա համեմատել է Վլադիմիր Պուտինին Հիտլերի հետ, իսկ Ղրիմի իրադարձությունները՝ 1938-ի չեխական ճգնաժամի»: Հոդվածագիրը նշում է, որ շատ արևմտյան քաղաքական գործիչներ և լրագրողներ, ովքեր կիսում են Քլինթոնի տեսակետը, համարում են, որ Նևիլ Չեմբերլենը դեմ չի եղել Հիտլերին 1938 թվականին և դրանով իսկ նրան թույլ է տվել չափել հնարավորությունները ողջ աշխարհը գրավելու գործում: Իսկ հետո «քաջ» Չերչիլը փրկել է աշխարհը:
Բացի եվրոպական պատմության հարցում բացարձակ անտեղյակությունից ու քրիստոնեական Ռուսաստանը կոմունիստական ԽՍՀՄ-ից տարբերելու անկարողությունից՝ արևմտյան քաղաքական գործիչները նույնպես չեն հասկանում, թե ինչ է կատարվում Ուկրաինայում՝ գրում է Հիթչենսը:
Բրիտանական պարբերականներից հազիվ թե մեկը հիշատակած լինի անցած շաբաթ Կիևի իրադարձությունների մասին, երբ 5 հոգուց կազմված խումբը, որից մեկը «ռասիստական» «Սվոբոդա» կուսակցության պատգամավոր էր, ներխուժել էր ուկրաինական գլխավոր հեռուստաալիքի տնօրեն Ալեքսանդր Պանտելեյմոնովի կաբինետ, հարձակվել նրա վրա, բղավել հակառուսական, ռասիստական հայհոյանքներ: Հարձակման մասնակիցներից մեկը եղել է խոսքի ազատության հարցով Ուկրաինայի Գերագույն ռադայի կոմիտեի անդամ՝ նշում է Հեթչենսը: Նրանք այնքան են պարծեցել իրենց արարքով, որ նկարահանել են այդ ամենը և տեսանյութը տեղադրել համացանցում: «Եվ այդ մարդիկ պետք է լինեն մեր դաշնակիցներն ու ընկերնե՞րը»,- հռետորական հարց է ուղղում հեղինակը:
