ՀՀ յոթ քաղաքական ուժեր՝ «Ազատություն», «Ազգային օրակարգ», «Երկիր ծիրանի», ՀՅԴ, «Մեկ Հայաստան», Հայաստանի դեմոկրատական և Ռամկավար Ազատական կուսակցություններ հանդես են եկել համատեղ հայտարարությամբ Հայաստանում դատարանների շուրջ ծավալված իրադարձությունների վերաբերյալ, որտեղ մասնավորապես նշված է. «Ի հակադրություն միջազգայնորեն ճանաչված և սահմանադրորեն ամրագրված այս սկզբունքների, ներկայիս քաղաքական իշխանությունը, ժողովրդաիշխանության և կոռուպցիայի դեմ պայքարի անվան տակ շահարկելով դատաիրավական համակարգում առկա և տարիների ընթացքում կուտակված խնդիրները, արատավոր երևույթները, ըստ էության, ձեռնամուխ է եղել ծայրահեղ գործողության՝ դատական իշխանության լիակատար յուրացմանը»:
Թեմայի շուրջ «Առաջին լրատվական»-ի հետ քննարկմանը մասնակցեցին «Անտարես» հրատարակչության տնօրեն Արմեն Մարտիրոսյանը, վերլուծաբաններ Հակոբ Բադալյանը և Աղասի Մարգարյանը:
«Այդ ուժերը դիրքավորվել են ընդդիմադիր կարգավիճակում և ցանկացած առիթ օգտագործում են այդ դիրքերից խոսելու համար: Նրանք նշում են տարիներով կուտակված խնդիրների մասին, բայց դա չափազանց մեղմ բնորոշում է, մենք գործ ունենք ոչ միայն տարիներով կուտակված խնդիրների, այլ իշխանությունը յուրացրած համակարգի հետ, որը հաստատվել էր քրեաօլիգարխիկ համակարգի շրջանակում: Հայտարարության մեջ խոսվում է իրավիճակի մասին, որը կարող է բնորոշ լինել կայացած քաղաքական համակարգ ունեցող երկրներին, և դատապարտում են, որ իշխանությունը փորձում է փոխել դատական համակարգը, բայց մենք գործ ունենք բացարձակապես այլ երևույթի հետ, այստեղ դատական համակարգը ընդամենը ցուցանակն է, որի ներքո այլ երևույթ է, որը եղել է նախկին քրեաօլիգարխիկ համակարգի մի մաս, և դա պետք է վերանա. նոր դատական համակարգ պետք է ստեղծենք»,- նշեց Հակոբ Բադալյանը:
«Անտարես» հրատարակչության տնօրեն Արմեն Մարտիրոսյանն ընդգծեց, որ այս իշխանությունները եկել են բարեփոխումների, այդ թվում նաև դատական համակարգի փոփոխությունների ծրագրով. «Այսինքն՝ Հայաստանի տերը, սահմանադիրը, ընտրելով այս իշխանությանը, քայլ է արել և այս հարցը դրել, որ խորհրդարանում հայտնված ուժերն իրականացնեն այս փոփոխությունը: Սա Ն. Փաշինյանի անձնական նախաձեռնությունը չէ… Իշխանությունը պետք է արագ գործի. պետք է արտահերթ նիստեր անել, ընտրել ՍԴ դատավորներ, պետք է ներկայացվի նոր ՍԴ նախագահի թեկնածու, իսկ Հ. Թովմասյանի, ՍԴ այսօրվա կազմի կողմից կայացված ոչ լեգիտիմ որոշումներին պետության օղակները պետք է տեղիք չտան»:
Մանրամասն՝ տեսանյութում: