«Ժառանգություն» կուսակցության անդամ Անահիտ Բախշյանն այսօր «Դեմ եմ» նախաձեռնության հանրահավաքին «Առաջին լրատվական»-ի հետ զրույցում նշեց, որ առանց քաղաքական ուժերի աջակցության մեր երիտասարդների՝ մաքուր և գեղեցիկ շարժումը չի կարող ճիշտ հանգուցալուծում ստանալ:
Այնպես որ, ըստ նրա՝ անխուսափելի է քաղաքացիական հասարակություն և քաղաքական ուժերի համագործակցությունը:
«Այն, ինչ այսօր այստեղ ասվեց քաղաքական ուժերի կողմից, դրա հանգուցալուծումը ակնհայտ է՝ իշխանափոխությունն է: Բոլոր արատները այս գործող իշխանության արատներն են, և առանց քաղաքական մարմնի այդ արատները վերացնել չի լինի»,- ասաց նա:
Անահիտ Բախշյանի խոսքով՝ «Դեմ եմ» շաժումը ՍԴ հասավ միայն քաղաքական ուժերի շնորհիվ. «Այստեղ ինչքան էլ գոռային, եթե քաղաքական ուժերը խորհրդարանում չմիավորվեին և ՍԴ չդիմեին, ցավոք սրտի՝ ոչնչի չէին հասնի. թող հաշտվեն այն մտքի հետ, որ առանց քաղաքական ուժերի չի լինի»:
Նա նաև նշեց, որ հավատում է երիտասարդներին, շատ ոգևորված է: «Մենք պետք է արժանի լինենք այս երիտասարդներին: Այսօր դեռ արժանի չենք, որովհետև այն Հայաստանը, որ ունենք, այս երիտասարդների համար ապահով պետություն չի ստեղծել: Մենք մեղավոր ենք, մենք պետք է մերը ասենք, դուրս գանք, իրենք գան»,- հավելեց Անահիտ Բախշյանը:
