Եվրահանձնաժողովի նախագահի պաշտոնում ընտրել են Ուրսուլա Ֆոն Դեր Լեյենին: Գերմանացի քաղաքական գործչին 747 բազկաթոռից բաղկացած Եվրախորհրդարանում ընտրվելու համար անհրաժեշտ էր ձեռքբերել 374 ձայն: Ձայները հաշվելուց հետո պարզվել է, որ Ուրսուլա Ֆոն Դեր Լեյենը ձեռք է բերել 383 ձայն: Նրա դեմ է քվեարկել 327 պատգամավոր: Համապատասխանաբար, նա Եվրահանձնաժողովի նախագահի պաշտոնում Ժան-Կլոդ Յունկերին կփոխարինի նոյեմբերի մեկից:
Գերմանիայի պաշտպանության նախարար Ուրսուլա Ֆոն Դեր Լեյենը միության պատմության մեջ Եվրահանձնաժողովի առաջին կին ղեկավարն է: Հատկանշական է, որ 2013 թվականին քաղաքական գործիչը դարձել է Գերմանիայի պաշտպանության առաջին կին նախարարը: Դրանից հետո Ուրսուլա Ֆոն Դեր Լեյենը զբաղեցնում է նշված պաշտոնը:
Գլոբալիզացիայի և տարածաշրջանային համագործակցության վերլուծական կենտրոնի նախագահ Ստեփան Գրիգորյանի կարծիքով՝ շատ դրական է, որ այդ պաշտոնում ընտրվել է Գերմանիայի ներկայացուցիչը։ «Այս անցումային փուլում, երբ Եվրամիությունը լուրջ խնդիրներ ունի Չինաստանի, Միացյալ Նահանգների, Ռուսաստանի հետ, շատ կարևոր է, որ գլխավոր դերերում լինեն Գերմանիայի, Ֆրանսիայի, այսինքն՝ ԵՄ լիդեր պետությունների ներկայացուցիչները»,-«Առաջին լրատվական»-ի հետ զրույցում ասաց նա։
Գրիգորյանն ասաց, որ Ուրսուլա Ֆոն Դեր Լեյենը հետաքրքիր գործիչ է, երկար տարիներ պաշտոններ է զբաղեցրել. «Մեծ փորձ ունի հենց կառավարման ոլորտում, ինչը շատ կարևոր է»։
Ստեփան Գրիգորյանը նշում է, որ Եվրամիության ղեկավարության փոփոխությունները դրական կանդրադառնան նաև Հայաստանի վրա, քանի որ առայժմ աշխատող ղեկավարները փորձ ունեին աշխատել ՀՀ նախկին իշխանությունների հետ. «Որքան էլ Ֆեդերիկա Մոգերինին, Դոնալդ Տուսկը, Յունկերը լավ հարաբերություններ ունենային մեզ հետ, լավ տրամադրված լինեին՝ եկեք իրար չխաբենք, նրանք բավականին երկար ժամանակ աշխատել են ՀՀ նախկին իշխանությունների հետ։ Հիմա նոր, թարմ դեմքեր կգան, որոնք կընկալեն Հայաստանի իշխանություններին և Հայաստանն առհասարակ մաքուր էջից։ Ակնհայտ է, որ ՀՀ նախկին իշխանությունները մինչ այսօր աշխատում են գործողներին տապալելու ուղղությամբ ու գաղտնիք չէ, որ այս ճանապարհին օգտագործում են իրենց միջազգային հին կապերը, ուստի դրական է, որ ԵՄ ղեկավարները լինեն նոր դեմքերով»։
Քաղաքագետը նշեց՝ առաջին հերթին նորերի հետ պետք է խոսել Հայաստան-Եվրամիություն Համապարփակ և ընդլայնված գործընկերության համաձայնագրի ճանապարհային քարտեզի մասին. «Դուք գիտեք, որ իշխանությունները պատրաստել են այդ քարտեզը, այն մի քանի օր առաջ հրապարակվեց ու դա պետք է դարձնել իրենց հետ աշխատանքի գլխավոր դրոշը։ Այդ դեպքում՝ իմպլեմենտացիան ավելի ակտիվ կերպով կընթանա»։
Մեր զրուցակիցը մատնանշեց նաև երկրորդ կարևոր հանգամանքը. «Քանի որ նոր իշխանությունները պետք է մաքուր էջից սկսեն այդ հարաբերությունները՝ նոր ղեկավարներից պետք է խնդրել ու ակնկալել ֆինանսական աջակցության լուրջ ավելացում։ Նախկին ու գնացող ղեկավարությունը մեծ պարտավորություններ իր վրա չի վերցրել, ռիսկ չէր անի աջակցությունը 10 անգամ մեծացնել, իսկ նորերը կարող են դա անել։ Հիշում եք՝ մեկ տարի առաջվա՝ Բրյուսելում հնչեցրած խնդրանքը հայտնի, այն պետք է թարմացնել»։