Վարչապետ Նիկոլ Փաշինյանի հրամանով ստեղծվել է օպերատիվ կառավարման շտաբ՝ հնարավոր արտակարգ իրավիճակների, աղետների հետևանքը վերացնելու համար: Շտաբի ստեղծումը անկասկած կարևոր քայլ է՝ նկատի ունենալով այն, որ ամառային այս շրջանում արդեն իսկ գործ ենք ունեցել մի քանի արտակարգ իրավիճակների հետ՝ էլեկտրաէներգիայի խոշոր վթար, տարբեր տեղերում խոտածածկ և անտառային տարածքների հրդեհներ, նաև մի շարք տեղերում տարաբնույթ սոցիալ-կենցաղային խնդիրներ, որոնք արտակարգ իրավիճակ չեն առաջացրել, սակայն այդ մասով, այսպես ասած, կարծես թե քայլում ենք եզրով:
Առկա իրավիճակը իրապես պահանջում է հետագա զարգացումների կանխարգելիչ քայլեր, և օպերատիվ շտաբի ձևավորումը վարչապետի իրապես համարժեք քայլ է զուտ կառավարման արդյունավետության տրամաբանության տեսանկյունից:
Մյուս կողմից՝ այդ նախաձեռնությունը հիմք է տալիս նաև եզրակացնելու, որ կառավարությունը գուցե սպասում է, այսպես ասած, «արտակարգ իրավիճակների» արհեստական խթանման ալիքի, որի նպատակը պետք է լինի Հայաստանում այնպիսի իրավիճակի ստեղծումը, ինչը թույլ կտա խոսել անկառավարելիության մասին և դրանից քաղել քաղաքական դիվիդենդներ: Այդ մտավախության կամ ռիսկի մասին խորհելու հիմք առաջացնում է նաև քարոզչական դաշտում չափազանց նկատելի տրենդը, որի նպատակն է հանրության մոտ թողնել տպավորություն, որ ամեն ինչ ձեռքից գնում է, չկա կառավարում, կառավարման համակարգում քաոս է, սիրողականություն, խնդիրներին չտիրապետելու համատարած երևույթ և այլն: Եթե կա այդպիսի ակնառու քարոզչական տրենդ, ապա այդ դեպքում պետք չէ բացառել նաև, որ այդ քարոզչության համոզչականության համար կարվեն այլ կոնկրետ քայլեր: Առավել ևս, որ ներկայիս իրավիճակում քարոզչությունն ակնհայտորեն չի տալիս իր արդյունքը, և օրերս Միջազգային հանրապետական ինստիտուտ ամերիկյան կազմակերպության իրականացրած սոցհարցումը ցույց էր տվել, որ իշխանության վարկանիշը բավականին բարձր է մնում:
Միևնույն ժամանակ վարչապետ Փաշինյանի նախաձեռնությունը և օպերատիվ շտաբի ստեղծումը կոնկրետ հետաքրքրություն է ներկայացնում էներգետիկ համակարգի խոշոր վթարի համատեքստում, որ արձանագրվեց օրերս Հայաստանում: Ազգային անվտանգության ծառայության պետ Արթուր Վանեցյանը կառավարության վերջին նիստում հայտարարեց, որ հանձնարարել է կատարել քննություն՝ պարզելու համար, թե արդյոք կա՞ մարդածին գործոն: Օրերս էլ ԱԱԾ պետը հայտարարել էր, որ նախնական եզրակացությունը պարզ կլինի տասը օրից: Արդյոք արդեն իսկ կա՞ն որոշակի տվյալներ կամ դրանց «ուրվագծեր», որոնք կարող են խոսել որոշակի ռիսկերի մասին, ինչի հիման վրա էլ վարչապետ Փաշինյանը ստեղծում է օպերատիվ շտաբը՝ արտակարգ իրավիճակների պատրաստ լինելու համար:
Ի դեպ, հատկանշական է, որ շտաբը ղեկավարելու է արտակարգ իրավիճակների նախարար Ֆելիքս Ցոլակյանը: Դե, իհարկե, էլ ուրիշ ով, ելնելով անշուշտ ոլորտային հանգամանքից: Բայց բոլոր դեպքերում խորհրդանշական է նաև, որ Ցոլակյանն ԱԱԾ նախկին գեներալ է:
Լուսանկարը՝ Photolure-ի
