ԱԺ նախկին պատգամավոր, գեներալ Մանվել Գրիգորյանի գործով դատական նիստն այսօր մեկնարկեց և արագ հետաձգվեց, քանի որ Մանվել Գրիգորյանը դատարան չէր բերվել՝ վատառողջ լինելու պատճառով:
Դատարանը «Նաիրի» բժշկական կենտրոնից գրություն էր ստացել, որը փաստում է, որ Գրիգորյանը չի կարող ներկայանալ նիստերին:
Նախորդ նիստը ևս հետաձգվել էր, քանի որ Մանվել Գրիգորյանը չէր կարողացել ներկայանալ դատարան:
Մանվել Գրիգորյանի փաստաբան Արսեն Մկրտչյանից լրագրողները հետաքրքրվեցին՝ ճի՞շտ են տեղեկությունները, որ հնարավոր է Մանվել Գրիգորյանի վերջույթներն անդամահատեն: Փաստաբանն ասաց, որ կարող է հաստատել այն տեղեկությունը, որ նման վտանգի մասին հայտարարել է մասնագետ բժիշկը:
«Բոլորդ էլ շատ քաջ գիտակցում եք, որ Մանվել Գրիգորյանի առողջական վիճակն այնպիսին է, որ եթե նախանցած դատական նիստին դատավորը կարող էր ասել, որ միայն այն, որ նա ներկա է դատական նիստին, խափանման միջոցը չպետք է փոխվի, հիմա այսօր ներկա չէ: Չգիտեմ՝ ինչ եզրահանգման կգա հանձնաժողովային փորձաքննությունը, որովհետև այդ դառը փորձն ունեցել ենք, երբ այդ փորձաքննությունը ոչ պատշաճ անձի կողմից ստորագրվում է ոչ նորմալ պայմաններում, ճնշումների տակ է իրականացվում, բայց փաստը մնում է փաստ, որ Մանվել Գրիգորյանի առողջությունը գնալով վատթարանում է»,- ասաց փաստաբանը:
