2011 թ. առաջին 5 ամիսներին ՀՀ Տնտեսական մրցակցության պաշտպանության պետական հանձնաժողովը (ՏՄՊՊՀ) տնտեսվարողներին պատասխանատվության ենթարկելու վերաբերյալ կայացրել է 204 որոշումներ, որոնցից դատական կարգով բողոքարկվել են ընդամենը 3-ը, որից մեկի գծով դատարանն արդեն կայացրել է որոշում և Հանձնաժողովին տվել է վճարման կարգադրություն՝ տուգանքը բռնագանձելու համար:
ՏՄՊՊՀ-ից «Առաջին լրատվականին» հայտնեցին, որ 2010 թ-ի ընթացքում Հանձնաժողովը տնտեսվարողներին պատասխանատվության ենթարկելու վերաբերյալ կայացրել է 107 որոշումներ՝ 2009 թ.-ի 31-ի համեմատ: Այդ 107 որոշումներից 28-ը բողոքարկվել է դատական կարգով, որից 9-ի գծով դատարանն արդեն իսկ կայացրել է որոշումներ հօգուտ Հանձնաժողովի՝ մերժելով տնտեսվարողների կողմից ներկայացված հայցերը:
Այսպիսով, նշված ժամանակահատվածում դատական կարգով քննված բոլոր գործերի դեպքում Հանձնաժողովի կայացրած որոշումները մնացել են անփոփոխ, այսինքն՝ որևէ անգամ Հանձնաժողովի կայացրած որոշումները դատական կարգով անվավեր չեն ճանաչվել:
Նշենք նաև, որ Հանձնաժողովի կողմից ընդունված տուգանք սահմանող որոշումների հիման վրա 2010 թ.-ին պետական բյուջե է գանձվել 22.5 մլն դրամ՝ 2009 թ.-ի 3.5 մլն դրամի համեմատ, իսկ 2011 թ.-ի հունվար-մայիսին ՏՄՊՊՀ-ի կողմից տնտեսվարողներին նշանակված տուգանքի չափը կազմել է շուրջ 220 մլն դրամ:
