Ֆրանսիայի ղեկավարությունը երկրի նախկին նախագահ Նիկոլա Սարկոզիի հոդվածը, որում նա իր հեռախոսների «գաղտնալսումը» համեմատել է ԳԴՀ-ի ժամանակների պետանվտանգության նախարարության՝ Շտազիի հետ, վիրավորանք է համարում երկրի ամբողջ դատական համակարգի համար:
«Նման համեմատությունները ու ակնարկները, որ մեր հանրապետությունը հիմնված չէ ազատության սկզբունքների վրա, անթույլատրելի են»,- ITAR-TASS-ը մեջբերում է Ֆրանսիայի նախագահ Ֆրանսուա Օլանդի խոսքերը, ով ներկայում մասնակցում է Բրյուսելում ընթացող ԵՄ գագաթնաժողովին:
Նա ընդգծել է, որ մտադիր չէ ներքաշվել բանավեճի մեջ: Սակայն նշել է, որ երկրի նախկին նախագահի հեռախոսազրույցները լսելը առաջին դեպքն է Ֆրանսիայի պատմության մեջ, ու այն նախաձեռնվել է «անկախ դատավորների կողմից՝ առանց իշխանության գործադիր ճյուղերի՝ արդարադատության կամ ներքին գործերի նախարարության միջամտության»:
«Դա պարզապես վիրավորական է Ֆրանսիայի ամբողջ դատական համակարգի ու իրավապահ մարմինների համար»,- այսօր Փարիզում հայտարարել է երկրի ՆԳՆ ղեկավար Մանուել Վալսը: Նախարարը նշել է, որ ոչ ինքը, ոչ էլ իր շրջապատը տեղյակ չեն եղել, որ վերջին մի քանի ամիսներին Սարկոզիի հեռախոսները գաղտնալսվում են:
