«Երևանի պետական համալսարանի բարեփոխումների հանձնաժողովն այս պահին փաստացի չի գործում։ Արամ Սիմոնյանի հրաժարականով այդ էջը փակել ենք, և համալսարանական ծրագրերն արդեն իրենց բնականոն հունով պետք է շարունակվեն։ Բայց բարեփոխումներ պետք է կատարվեն, դրանք ժամանակի հրամայական են»,- «Առաջին լրատվական»-ի հետ զրույցում ասաց ԵՊՀ իրավագիտության ֆակուլտետի քաղաքացիական դատավարության ամբիոնի վարիչ, իրավագիտության դոկտոր, պրոֆեսոր Վահե Հովհաննիսյանը։
Նրա խոսքերով՝ մայր բուհում բարեփոխումների հանձնաժողովի առաջարկներից կատարման փուլում է գտնվում համալսարանի կառուցվածքային փոփոխություններին ուղղված առաջարկությունների փաթեթը, որը մի մասով ընդունվել է, իսկ չնչին մասով՝ գիտխորհրդում չի հաստատվել։
Հովհաննիսյանը խոսեց նաև ԵՊՀ-ի, առհասարակ բուհերի ապաքաղաքականացման անհրաժեշտության մասին, նշեց, որ բուհերի ապաքաղաքականացումը պետք է լինի գերակա ուղղություն, և ներկայումս պետք է այդ երևույթը։
Հովհաննիսյանը կարևորեց նաև բուհերի ու աշխատաշուկայի փոխհամաձայնեցված գործելու անհրաժեշտության մասին։ «Դա լուրջ խնդիր է։ Այսօր բազմաթիվ հետազոտություններ են կատարվում այդ ուղղությամբ, որի արդյունքում կարելի է պարզել, թե ինչ խնդիր կա։ Բայց երկու խնդիր կա՝ կամ համալսարանները չեն իրականացնում այնպիսի կրթություն, որի պահանջարկը կա աշխատաշուկայում, կամ տալիս են այնպիսի կրթություն, որը չի բավարարում աշխատաշուկայի պահանջներին։ Կա նաև հակառակ խնդիրը, որ շուկայում կա կոնկրետ մասնագիտությունների պահանջ, բայց նման կրթություն բուհերը չեն տալիս։ Համալսարան-աշխատաշուկա կապը ոչ համարժեք է, և գործիքակազմով պետք է ազդել դրա վրա։ Բուհը պետք է որոշակի առումով ազդի աշխատաշուկայի ձևավորման վրա»,- ասաց Հովհաննիսյանը։
Առավել մանրամասն՝ տեսանյութում։
