«Ներկա դրությամբ ունենք խորհրդարանի ներսում շատ կառուցողական համագործակցություն, բայց այդ համագործակցությունը միայն խորհրդարանում է»,- այսօր լրագրողների հետ հանդիպման ընթացքում հայտարարեց «Ժառանգություն» կուսակցության առաջնորդ Րաֆֆի Հովհաննիսյանը:
«Ես կասեի՝ ընդդիմադիր չորս ուժերի մեջ համագործակցություն: Կարևոր է, նաև որ այս վերջին շրջանում խորհրդարանական օրինագծերը, նախագծերը քննարկում են ամբողջական և որոշակի արդյունքներով:
Մինչև հիմա չի կայացել չորս ուժերի ղեկավարների հավաքը, որը իմ, նաև՝ ուրիշների կարծիքով, թույլ կտա որոշ անհարթություններ շտկել, որոշ տարաձայնություններ հարթել և իսկապես խոսել չորսի ձևաչափի մասին: Ներկա դրությամբ այդ ձևաչափը գործում է միայն խորհրդարանում»:
Հովհաննիսյանը ընդգծեց, որ կառավարության հրաժարականը համարում են կիսամիջոց. «Արատը վերևից է. ամբողջ իշխանությունը՝ պարոն Սերժ Սարգսյանից սկսած, պետք է հեռանա:
Նրանք ովքեր համարում են, որ անցյալ տարվա նախագահական ընտրությունները կեղծվել են, նրանք պետք է ընդունեն ամբողջական իշխանափոխության գաղափարը, և պետք է միասին ճշտենք Ճանապարհային քարտեզը այդ նպատակին հասնելու համար: «Ներկա դրությամբ չկա այդ համաձայնությունը, բայց դա չի նշանակում, որ «Ժառանգությունը» խորհրդարանում հետ է կանգնում: Այնուամենայնիվ, մենք կարծում ենք, որ ամբողջ ղեկավարությունը պետք է փոխվի»,- ասաց նա:
Րաֆֆի Հովհաննիսյանը նաև հույս հայտնեց, որ չորս ուժերի ղեկավարները կհանդիպեն հրապարակում, և ոչ միայն նրանք, այլև քաղաքացիական մյուս նախաձեռնությունները:
Լուսանկարը` PAN Photo-ի
