Լրագրողները ԵՊՀ ռեկտոր Արամ Սիմոնյանից հետաքրքրվել են վերջինիս հարաբերությունների մասին Սերժ Սարգսյանի եղբոր՝ ԵՊՀ աստվածաբանության ֆակուլտետի հայ եկեղեցու պատմության և եկեղեցաբանության ամբիոնի վարիչ Լևոն Սարգսյանի հետ՝ Լևոն Սարգսյա՞նն է ղեկավարում Արամ Սիմոնյանին, թե՞ Արամ Սիմոնյանը՝ Լևոն Սարգսյանին:
Արամ Սիմոնյանն ասել է, որ ինքն է ղեկավարում համալսարանը, իսկ Լևոն Սարգսյանը ամբիոնի վարիչ է. «Որպես ամբոնի վարիչ՝ նա, բնականաբար, այն կարգուկանոնին է ենթարկվում, ինչ և բոլոր համալսարանականները: Լևոն Սարգսյանը բավականին լավ մասնագետ է իր մասնագիտության մեջ, և դուք դրանում կարող եք համոզվել, եթե ծանոթանաք նրա աշխատանքներին»:
Արամ Սիմոնյանն այնուհետև ավելացրել է, որ Լևոն Սարգսյանը համալսարանում որպես անձնավորություն իրեն պահում է շատ համեստ, շատ գործնական, և իրենց հանդիպումները (դրանք հիմնականում աստվածաբանության ֆակուլտետում են տեղի ունենում) գործնական բնույթի են և վերաբերում են միայն աստվածաբանության ֆակուլտետի խնդիրներին: «Որևէ այլ տիպի հարաբերություններ ղեկավարվելու, կառավարվելու և այլն, հավատացնում եմ, որ գոյութուն չունի և չի կարող ունենալ»,- եզրափակել է ռեկտորը:
