Ես չեմ հավատում, որ Եվրոպան, Ամերիկան դիվանագիտությունից և հռետորաբանությունից դուրս կգործեն ԼՂ հակամարտությունում. «ՆԱՏՕ և Հարավային Կովկաս՝ ռազմավարական մոտեցումներ տարածաշրջանի անվտանգությանը» միջազգային կոնֆերանսի ընթացքում իր ելույթում այս մասին ասաց Ամերիկայի արտաքին քաղաքականության խորհրդի ներկայացուցիչ Վայն Մերին:
Նա ասաց, որ ԱՄՆ-ի համար Կենտրոնական Կովկասում առանցքային դերակատարություն ունի Թուրքիան, որը ԱՄՆ-ի միակ գործընկերն է: Այդ դերակատարությունը, ըստ նրա, մեծանում է ավելի դինամիկ, քան տասը կամ քսան տարի առաջ, և այդ կարևորությունը ավելանալու է էլ ավելի դինամիկ կերպով: «Ես կարևոր եմ համարում, որ Թուրքիան կարողանա պահպանել իր հարաբերությունները տարածաշրջանային տերությունների հետ, Թուրքիան պետք է աջակցի Հայաստանի, Ադրբեջանի և Վրաստանի դիվանագիտական հարաբերություններին»,- ասաց նա՝ շարունակելով, որ Հարավային Կովկասի իրավիճակը մտահոգիչ է:
Վայն Մերին նշեց, որ 1990-ական թթ. ամերիկյան հետաքրքրությունները տարածաշրջանում ավելի շատ էին, քանի որ տարածաշրջանային երկրներից մեծ սպասելիքներ կային: «Հույս կար, որ կովկասյան երկրները տարածաշրջանային նախագծերում կներգրավվեն, և դա չարդարացվեց: Ամերիկյան հույսերը չարդարացան:
Ավելի վաղ Ամերիկայի ունեցած հույսերը տարածաշրջանի վերաբերյալ չափազանց օպտիմիստական դուրս եկան: Ամերիկյան դիվանագետները զբաղվում են հակամարտություններով, ցավալի է, որ մեծ հաջողություն չկա, հիասթափություն կա, անհանգստություն, այդ անհանգստությունը իհարկե գալիս է Հայաստանի և Ադրբեջանի միջև պոտենցիալ հակամարտության վտանգից: Այդ անհանգստությունը մնում է, ես տեսնում եմ շարունակություն, մրցակցություն, բախումներ և մենթալիտետ երկու կողմերում, որը նման է Բելգրադի և Վիեննայի միջև տիրող տրամադրություններին անցյալում»,- ասաց Վայն Մերին:
Նա նշեց, որ հրադադարի հնարավոր խախտումը մեծ վնաս կհասցնի տարածաշրջանին: «Ես քիչ եմ հավատում, թե Եվրոպան, Ամերիկան կցանկանան մասնակցել, դիվանագիտությունից և հռետորաբանությունից բացի, այլ գործընթացում: Ես հիասթափված եմ, ես հույս ունեի, երբ գալիս էի այստեղ։ Իհարկե, տեսել եմ դրական փոփոխություններ, բայց դրանից ավելի շատ՝ կորսված հնարավորություններ»,- ասաց նա:
