«2003թ. Ռոբերտ Քոչարյանի գործունեությունն ուղղված էր այն բանին, որ բոլոր գործարարներին կարողանային հավաքել իրենց բուռը և ստիպեին կատարել այն բոլոր հրահանգները, որ իրենք կառաջարկեին՝ դրանով գործարարին գցելով փոսը, իսկ իրենք ունենալով իրենց կանխիկ գումարները, որոնք մեծ թվեր էին կազմում: Կոռուպցիոն մեխանիզմների հիմքը դրվեց այդ ժամանակ»,- «Առաջին լրատվական»-ի հետ զրույցում ասաց «Ռոյալ Արմենիա» ընկերության հիմնադիր, համասեփականատեր Գագիկ Հակոբյանը՝ անդրադառնալով «Ռոյալ Արմենիայի» աղմկահարույց գործին:
Նրա խոսքով՝ պետք էր համագործակցել մաքսային կոմիտեի ղեկավարության հետ. «Այսինքն՝ ներկայացնել արժեքից ցածր ֆակտուրաներ, որոնց գնային տարբերությունը մաքսային ծառայությունը հաշվարկում էր, հաշվարկվում էր նաև 20 տոկոս գումարը, որ պետք է որպես ԱԱՀ վճարվեր, և 50-50 էին անում, այսինքն՝ 20 տոկոսը դառնում էր 10 տոկոս, այսինքն՝ ամեն մի դոլար սուրճից իրենք ունենում էին իրենց 10 ցենտը»:
Գագիկ Հակոբյանը ընդգծեց, որ կոռուպցիոն այս սխեման պարտադիր էր բոլորի համար. «Իսկ ովքեր հրաժարվեցին, ի ցույց բոլորի պատժեցին՝ ի դեմս մեր կազմակերպության, որպեսզի մնացածները հասկանան, թե ինչ է սպասվում իրենց, եթե փորձեն չհամագործակցել իշխանությունների հետ: Խոսքը տարեկան միլիոն դոլարից ավելի գումարի մասին է»:
Փաստաբան Գևորգ Մինասյանն էլ նշեց, որ Գագիկ Հակոբյանին և ընկերության տնօրենին մեղադրանք առաջադրվեց այն բանի համար, որ Գագիկ Հակոբյանին ստիպել էին անել, և նա չէր արել. «Չարած բանի համար մեղադրանք առաջադրվեց՝ իբր նա հաշիվ-ապրանքագրեր է կեղծել: Նպատակն էր մեղադրել ըմբոստ գործարարին և պահպանել կոռուպցիոն բուրգը, իսկ պատճառները հնարովի էին»:
Հարցազրույցն ամբողջությամբ՝ տեսանյութում:
