Մարոկկոյում առաջին արևային էլեկտրակայանը՝ «Նուրը» («Լույս»), աշխատանքը կսկսի 2015թ. օգոստոսին: Այն կառուցվում է հարավարևելյան Ուարզազատ նահանգում: Այս մասին հայտնել է Մարոկկոյի Արևային էներգիայի գործակալության ղեկավար Մուստաֆա Բակուրին՝ գրում է «Էկոնոմիստը»:
Ուարզազատի արևային էլեկտրակայանը կդառնա էներգետիկ վիթխարի նախագծի առաջին փուլը, որը գործարկվել է Թագավորությունում 2009թ. նոյեմբերին:
Սպասվում է, որ այն ժամանակի ընթացքում կաշխատի իր առավելագույն՝ 500 ՄՎտ հզորությամբ:
Իշխանությունները համարում են, որ «նախագիծը հնարավորություն կտա օպտիմալացնել Թագավորության բնական ռեսուրսների օգտագործումը, պահպանել շրջակա միջավայրը, խթանել սոցիալ-տնտեսական զարգացումը, ինչպես նաև ապահովել հետագա սերունդների ապագան»:
Ընդհանուր առմամբ Մարոկկոյում նախատեսված է 2000 ՄՎտ հզորությամբ խոշոր արևային կայանների ցանցի կառուցում:
Նախագծի հեղինակները հույս ունեն բավարարել էներգետիկ ռեսուրսներում տնտեսության աճող պահանջմունքները: