«Նոր դեմոկրատիա» պահպանողական կուսակցության առաջնորդ Կիրիակոս Միցոտակիսը երդվեց որպես Հունաստանի նոր վարչապետ:
Միցոտակիսը երդվել է Ավետարանի վրա Սուրբ Երրորդության անունով հավատարիմ մնալ Սահմանադրությանը և երկրի օրենքներին, ինչպես նաև ծառայել հույն ժողովրդի շահերին։
Արարողությունը տեղի է ունեցել նախագահական պալատում, նախագահ Պրոկոպիս Պավլոպուլոսի ներկայությամբ և հեռարձակվել է երկրի պետական հեռուստատեսությամբ: Մինչ այդ, Պավլոպուլոսը 51-ամյա Միցոտակիսին կառավարություն ձևավորելու մանդատ է տվել:
Հուլիսի 7-ի խորհրդարանական ընտրություններում Միցոտակիսի «Նոր դեմոկրատիա» կուսակցությունը 158 տեղ է ստացել 300 տեղանոց խորհրդարանում և կարող է ինքնուրույն ձևավորել կառավարությունը:
Միցոտակիսն ամուսնացած է, ունի երեք երեխա:
