Իրանը ԱՄՆ-ին սպառնացել է պատերազմով և կարողացել է խուսափել ամերիկյան հարվածից: Այս մասին հաղորդել է Իրանի քաղպաշտպանության վարչության ղեկավար, բրիգադային գեներալ Ռեզա Ջալալին, որի խոսքերը փոխանցում է Reuters-ը:
«Ներխուժող անօդաչուն ոչնչացնելուց հետո ԱՄՆ-ը դիվանագիտական միջնորդների միջոցով փոխանցել է, որ ցանկանում են անցկացնել տեղային գործողություն: Բայց Իրանի պատասխանը հասկացրել է՝ յուրաքանչյուր գործողություն կգնահատվի որպես պատերազմի սկիզբ»,- ասել է Ջալալին:
Հունիսի 21-ին ԱՄՆ նախագահ Դոնալդ Թրամփը հայտարարել է, որ կանգնեցրել է ԱՄՆ Զինված ուժերի հարվածը Իրանի նկատմամբ՝ 10 րոպե առաջ այն բանից, երբ այն պետք է տեղի ունենար: Նրա խոսքով՝ ամերիկացի զինվորականները պատրաստ էին հարձակվել Իրանի միանգամից երեք տարբեր օբյեկտների վրա, բայց նա չեղարկել է գրոհը, երբ գեներալներից մեկից իմացել է, որ հարվածի հետևանքով կզոհվի մոտավորապես 150 մարդ: Այնուհետև նա հստակեցրել է, որ միայն «կասեցրել» է գրոհը:
Դրանից մեկ օր առաջ Իսլամական հեղափոխության պահապանների կորպուսը խփել է ԱՄՆ հետախուզական անօդաչու սարքը: Ամերիկյան կողմը սկզբում հերքել է այդ հաղորդագրությունը, սակայն հետո խոստովանել է, որ Իրանը խփել է ամերիկյան խոշորագույն անօդաչուներից մեկը՝ RQ-4A BAMS-D:
