«Ես դեռ իմ ուզած երկիրը չեմ տեսնում, անգամ այսօր՝ հեղափոխությունից հետո, շատ հեռու ենք. ցեխից դուրս ենք եկել, մտել ենք ճահիճ»,- «Առաջին լրատվական»-ի հետ զրույցում այս տեսակետը հայտնեց ռեժիսոր Լևոն Իվանյանը:
Նրա դիտարկմամբ՝ նախևառաջ անհրաժեշտ է միասնականություն երկրում: «Որևէ երկիր, եթե ուզում են կործանել, պառակտում են, մեր երկիրը պառակտված է, չկա միասնականություն, դա մեր ամենամեծ ցավն է… Ն. Փաշինյանն ունի լիդերի հատկություններ, բայց միավորող հատկություններ չունի, ունի պառակտող հատկություններ: Որոշ ժամանակ առաջ նա երկիրը բաժանեց «սևերի ու սպիտակների», դա շատ վատ է: Վատ է նաև բազմակուսակցական համակարգը, դա բերում է երկրի զարգացման մի քանի տեսակետների, ես չեմ կարծում, որ տարբեր տեսակետների բախումից է ծնվում լավագույն տարբերակը: Դարեհ արքան, երբ որ աշխարհի տիրակալ էր, ասում էր. «Հայերին հնարավոր չէ հաղթել, նրանց հնարավոր է բաժանել. բաժանի՛ր և կտիրես»:
«Ժամանակակից գաղափարախոսությունը, որ տանում է դեմոկրատիայի, ազգային չէ: Մենք դատապարտված ենք գնալ դեմոկրատական ճանապարհով, որը մեր ճանապարհը չէ: Հազարավոր տարիներ երազեցինք պետականության մասին, եկանք դեմոկրատիայի ճանկն ընկանք: Մեզ դեմոկրատիա պետք չէ, ազգային պետություն է պետք»,- նշեց Լևոն Իվանյանը:
Մանրամասն տեսանյութում: