ՀՀ ԱԻ նախարար Ֆելիքս Ցոլակյանը հուլիսի 4-ին ընդունել է «Աղետների ռիսկերի կառավարման ազգային ծրագրին» տեխնիկական աջակցություն ցուցաբերելու առաքելությամբ Հայաստան ժամանած Համաշխարհային բանկի աշխատանքային խմբին՝ Տաֆաձվա Դուբիի գլխավորությամբ:
Ինչպես տեղեկացրին ՀՀ արտակարգ իրավիճակների նախարարության տեղեկատվության և հասարակայնության հետ կապերի վարչությունից, նախարար Ֆելիքս Ցոլակյանը, բարձր գնահատելով ՀԲ գործունեությունը մեր երկրում, նշել է, որ ՀԲ աշխատանքային խումբը հեղինակել է բազմաբովանդակ և ընդգրկուն հայեցակարգային փաստաթուղթ, որը վերաբերում է ԱԻՆ բոլոր գործառույթներին և ցանկություն հայտնել այն դարձնել ավելի հասցեական՝ ընդգրկելով ԱԻՆ ներուժը, որպեսզի փոխգործակցությունը դառնա առավել արդյունավետ:
«Տաֆաձվա Դուբին, շնորհակալություն հայտնելով ընդունելության համար, նշեց, որ նախարար Ֆելիքս Ցոլակյանի և ԱՌԿ ու քաղաքային հարցերով Համաշխարհային բանկի տնօրեն Սամեհ Վահբայի Ժնևում կայացած հանդիպումը և նորաստեղծ փաստաթղթի նկատմամբ ունեցած նախարարի դրական վերաբերմունքը ոգևորիչ է:
Նա Հայաստանի արտակարգ իրավիճակներին արձագանքելու կարողությունները հասկանալու և գնահատելու համար առաջարկեց ՀԲ կողմից իրականացնել տեխնիկական առաջադրանք, որը կստուգի ԱԻ նախարարության և աղետներին առնչվող մյուս գերատեսչությունների ունակությունները:
Այս առումով, Տաֆաձվա Դուբին առաջարկեց դիտարկել որևէ երկրում ՀԲ կողմից իրականացված հաջողված փորձը:
Նախարար Ֆելիքս Ցոլակյանը ներկայացրեց իր դիտարկումը, ըստ որի, ցանկալի է, որ գործընթացն իրականացվի ՀԲ և ԱԻՆ մասնագետների ուժերով, քանզի հայկական կողմը լավագույնս տիրապետում է առկա խնդիրներին, գիտի բացերը և ունի ձևավորված նպատակ:
«Քանի որ ԱԻՆ ենք, պետք է ունենանք բոլոր գործիքներն ու հնարավորությունները, որոնք անհրաժեշտ են երկրում խնդիրների լուծման համար: Սա լավագույն և արդյունավետ ճանապարհն է: Հետևաբար՝ օրենքները պետք է համապատասխանեցվեն այս գաղափարաբանությանը»,- նշեց Ֆելիքս Ցոլակյանը:
Տաֆաձվա Դուբին համերաշխություն հայտնելով նախարարի մոտեցմանը՝ նշեց, որ ՀԲ ստեղծած փաստաթղթի նպատակը հայեցակարգային և համապարփակ մոտեցումն է աղետներին՝ պատրաստվածության և արձագանքման կարողություններն ընդլայնելու նպատակով»,- նշված է հաղորդագրության մեջ:
