Պաղեստինի էկոնոմիկայի նախարարությունը Հորդանան գետի Արևմտյան ափին նավթի հանքավայրերի որոնման միջազգային տենդեր է հայտարարել: Ինչպես հաղորդում է ITAR-TASS-ը, այս մասին հայտարարել է Իսրայելի տնտեսական մամուլը՝ վկայակոչելով Պաղեստինի տնտեսական հարցերով փոխվարչապետ Մուհամադ Մուստաֆային:
Տենդերին մասնակցելու հայտերը կընդունվեն մինչև հունիսի 30-ը: Սա նման տեսակի առաջին նախագիծն է պաղեստինյան տարածքներում: Մուստաֆայի խոսքով՝ տենդեր հայտարարելու նպատակն է հաստատել պաղեստինյան ինքնիշխանությունը Հորդանան գետի Արևմտյան ափի, Հորդանանի հովտի, Մեռյալ ծովի և Գազայի հատվածի ջրային տարածքների բնական ռեսուրսների վրա:
Նա նշել է, որ նավթի որոնումները նպատակ ունեն վերջ դնել Իսրայելից կախվածությանը, քանի որ ամուր տնտեսական հիմք կստեղծեն ապագա պաղեստինյան պետության համար:
Արևմտյան ափին նավթի հետախուզումը և արդյունահանումը վեճի առարկա են Իսրայելի և պաղեստինցիների միջև:
