Վահրամ Փափազյանի անվան Շեքսպիրյան միջազգային ամենամյա փառատոնն այսօր երեկոյան Երևանի Պատանի հանդիսատեսի թատրոնում կմեկնարկի «Լիր արքա» հայ-վրացական համատեղ ներկայացմամբ: «Լիր արքայի» բեմադրությանը մասնակցում են Թբիլիսիի Գրիբոյեդովի անվան թատրոնի դերասանները: Այս մասին այսօր հայտարարեց փառատոնի տնօրեն Հակոբ Ղազանչյանը:
Ի տարբերություն նախորդ տարիների՝ այս տարին փառատոնի համար առանձնահատուկ է նրանով, որ Հայաստան թատերախմբեր չեն ժամանի՝ ներկայացնելու իրենց ծրագրերը, այլ, ինչպես նշեց բանախոսը, հայ բեմադրիչները հնարավորություն ունեն ներկայացնելու իրենց աշխատանքը դրսից ժամանած հյուրերին, ինչը համագործակցության նոր հեռանկարներ կբացի տեղի բեմադրիչների համար:
«Այս տարի փառատոնը նշելու յուրահատուկ ձև է ընտրվել: Քանի որ Հայաստանի շեքսպիրյան փառառտոնը Շեքսպիրյան փառատոների ցանցի անդամ է, որոշեցինք ներկայացումները ցուցադրել փառատոների տնօրեններին»,- ասաց Հ. Ղազանչյանը՝ կարևորելով հետագա համագործակցության հնարավորությունը:
Փառատոնը, ինչպես տեղեկացրեց բանախոսը, այս տարի կանցկացվի երկու փուլով. մյուս մասը կանցկացվի աշնանը, իսկ այս հատվածը կկոչվի Շեքսպիրյան օրեր:
Ասուլիսին ներկա էր նաև Լոնդոնի «Գլոբուս» թատրոնի «Գլոբ թու գլոբ» Շեքսպիրյան փառատոնի տնօրեն Թոմ Բըրդը, որը հույս հայտնեց, որ 2015թ. կկարողանա Հայաստան գալ ու այստեղ ներկայացնել «Համլետը»: Բանն այն է, որ այս տարի լրանում է Շեքսպիրի 450-ամյակը, և «Գլոբուսը» վերջինիս հոբելյանական տարեդարձը նշելու է 2 տարի տևող համաշխարհային շրջագայությամբ: Բըրդը տեղեկացրեց, որ շրջագայությունը մեկնարկելու է գրողի ծննդյան օրը և ավարտվելու է մահվան օրը:
Շեքսպիրյան փառատոնի շրջանակում վաղը Չարենցի անվան գրականության և արվեստի թանգարանում ժ. 11:00-ին կբացվի «Շեքսպիրը» հայ թատրոնում» ցուցահանդես և կանցկացվի «Շեքսպիրը ժամանակակից թատրոնի քառուղիներում» խորագրով գիտաժողով Շեքսպիրյան փառատոների եվրոպական ցանցի տնօրենների մասնակցությամբ:
Շեքսպիրյան միջազգային փառատոնը կշարունակվի մինչև մարտի 22-ը:
