Հունաստանում պետական ոլորտի աշխատակիցները չորեքշաբթի և հինգշաբթի կանցկացնեն 48-ժամյա գործադուլ՝ ի նշան բողոքի հեռացումների և աշխատանքային իրավունքների ոտնահարման դեմ` միջազգային վարկատուների եռյակի (ԵՄ, ԵԿԲ և ԱՄՀ) ճնշման ներքո: Այս մասին գրում է ITAR-TASS-ը:
Ակցիային կմասնակցեն պետական հաստատությունների, տեղական ինքնակառավարման մարմինների աշխատակիցներ, պետական հիվանդանոցների բժիշկներ, ուսուցիչներ: Պետական բժշկական հաստատություններում այցելուներին կընդունեն միայն շտապ դեպքերում:
Բժիշկների արհմիության խոսքերով՝ վարկատուների հետ համաձայնության իրագործման տարիներին հիվանդանոցների անձնակազմը կրճատվել է տասն անգամ և չի կարող նորմալ կերպով կատարել իր գործառույթները:
Իսկ պետական ոլորտի արհմիությունների գերագույն խորհուրդը կառավարությանը մեղադրել է այն բանում, որ այն «շարունակում է վարկատուների հետ կեղծ բանակցությունների թատրոնը՝ համաձայնելով ԵՄ-ի և ԱՄՀ-ի պահանջներին՝ աշխատողների աշխատանքային իրավունքները հետագայում ևս ոտնահարելու նպատակով»:
Գործադուլի ընթացքում չորեքշաբթի և հինգշաբթի օրերին Աթենքում, Սալոնիկում և Հունաստանի այլ քաղաքներում տեղի կունենան հանրահավաքներ:
