ԵԽԽՎ-ում ՀՀ ԱԺ պատվիրակությունը՝ ԱԺ արտաքին հարաբերությունների մշտական հանձնաժողովի նախագահ Ռուբեն Ռուբինյանի ղեկավարությամբ, հունիսի 24-28-ը մասնակցել է Ստրասբուրգում կայացած վեհաժողովի ամառային նստաշրջանի երրորդ մասի աշխատանքներին:
«Առաջին լրատվական»-ի հետ զրույցում ԵԽԽՎ-ում ՀՀ պատվիրակության աշխատանքների և մի շարք այլ հարցերի շուրջ իրենց դիտարկումները ներկայացրին պատվիրակության անդամներ «Իմ քայլը» խմբակցության պատգամավորներ Սոս Ավետիսյանը և Տաթևիկ Հայրապետյանը:
«Հստակ դիրքորոշում կար, որ Ռուսաստանը պետք է վերադառնա. Պետք է երկու հանգամանք հաշվի առնել՝ ԵԽԽՎ-ում Ռուսաստանը ձայնի իրավունքից զրկվել էր ոչ համապատասխան գործընթացների պատճառով. Ռուսաստանին ձայնի իրավունքից զրկող մարմինը չուներ այդ իրավունքը, այսինքն՝ ի սկզբանե իրավական կազուսի հետ գործ ունենք: Քննարկվեց նաև անդամավճարի խնդիրը, Ռուսաստանը 70մլն եվրո անդամավճար պետք է մուծի, ԵԽԽՎ-ն սպասում է այդ որոշմանը, կարծում եմ կհաջորդեն այդ գործընթացները, որոնք կվերականգնեն Ռուսաստանի դիրքը որպես լիարժեք անդամ ԵԽ տարբեր կառույցներում»-նշեց Տ. Հայրապետյանը՝ հավելելով, որ ԵԽԽՎ-ն չի կարող վերածվել հակառուսական կառույցի. Ռուսաստանի վերադարձը շրջադարձային կլինի:
«Կարևոր է ընդգծել մարդու իրավունքները և ժողովրդավարությունը. Երբ խոսում ես ազգային օրակարգով, ավելի լսելի ես դառնում: Մարդիկ հոգնել են կրկնվող են մեղադրական թեզերից»,- նշեց Ս. Ավետիսյանը: Տ. Հայրապետյանը հավելեց. «Մենք չենք գնացել Ադրբեջանի քարոզչական անհիմն մեղադրանքներին պատասխանելու, այլ գնացել ենք աշխատելու, կապեր հաստատելու… Մեր պատվիրակությունը հանդես եկավ նախաձեռնողականությամբ. բանաձևերի նախագծեր ներկայացվեցին»:
Մանրամասն՝ տեսանյութում: